काठमाडाैं : नेपाल कम्युनिष्ट पार्टी (नेकपा) का महासचिव विष्णु पौडेलले आफूमाथि लागेको आरोप पुष्टि गर्न चुनाैति दिएका छन् ।
शुक्रबार विज्ञप्ति जारी गर्दै महासचिव पाैडेलले ललिता निवासको जग्गाको विषयमा आफूमाथि लगाइएको आराेपकाे पुष्टि गर्न चुनाैती दिए । सरकारी जग्गा हिनामिनामा आफ्नो संलग्नता नरहेको दाबी गर्दै उनले ललितानिवास परिसरको कित्ता नं. ३०९ को आठ आना जग्गा आफ्नो छोरा नवीन पौडेलको नाममा कानुनबमोजिम नै खरिद गरिएको बताए ।
मालपोत कार्यालयले खरिद बिक्री गर्न मिल्ने यकिन गरेपश्चात उमा ढकाल र माधवी सुवेदीको नाममा रहेको जग्गा आफूहरुले लिखत पारित गरी लाग्ने राजश्व बुझाएरै खरिद गरेको विज्ञप्तिमा जनाइएकाे छ ।
सरकारी जग्गा हडप्ने मनसायले कागज श्रेस्ता मिलाई किर्ते, जालसाजी वा गैरकानुनी कार्य गरी जग्गा दर्ता गर्ने वा गराउने कुनै पनि कार्यमा आफू र आफ्नो परिवारका कुनै पनि सदस्यको प्रत्यक्ष वा अप्रत्यक्ष संलग्नता नरहेको र कहिल्यै पनि नरहने उनले दाबी गरे । सरकारी जग्गा हडप्नेजस्ता अपराधजन्य गतिविधि आफूले सोच्नसमेत नसक्ने बताउँदै उनले २०६१ सालमा नवलपरासीको बर्दघाटस्थित आफ्नो ८ कठ्ठा जग्गा बेचेर आएको रकमले बालुवाटारमा ८ आना जग्गा खरिद गरेको प्रष्ट पारेका छन् । पुस २९ गते जग्गा खरिद गरेको र त्यो बेला आफू मन्त्री वा सांसद् नरहेको प्रष्टीकरण दिएका छन् ।
संविधानसभा सदस्यमा २०६४ सालमा रुपन्देही जिल्लाबाट निर्वाचित भएपश्चात् ललिता निवासको जग्गाबारे वार्षिक सम्पत्ति विवरणमा उल्लेख गर्दै आएको पनि उनले बताए ।बालुवाटारको जग्गा हिनामिनाका सम्बन्धमा सरकारले आवश्यक कमद चालिसकेको भन्दै उनले सरकारले चालेको कदमलाई पनि स्वागत र समर्थन गरेका छन् ।
हेर्नुस् विज्ञप्तिकाे पूर्णपाठ :
प्रकाशित मिति: शुक्रबार, वैशाख ६, २०७६ २३:५८
