फराह : अफगानिस्तानको घाज्नी प्रान्तमा गत रात रातभर तालिबान लडाकू समूह र सुरक्षाफौजबीच भएको भिडन्तमा कम्तीमा १२ तालिबान लडाकु मारिएका बताइएको छ ।
सो झडपमा परी तीन सरकारी सुरक्षाकर्मीको पनि मृत्यु भएको छ । झडपमा परी नौ तालिबान लडाकु घाइते भएका स्थानीय प्रहरी अधिकारीले जनाएका छन् ।
घाज्नी प्रान्तको उत्तरी इलाकाका दुईवटा गाउँमा रहेका प्रहरी चौकीमा उक्त भिडन्त भएको थियो । सो आक्रमणको सुरक्षा अधिकारीले गरेको जवाफी कारबाहीमा परी १२ तालिबान लडाकु मारिएका जनाइएको छ ।
गत अप्रिलमा तालिबान लडाकु समूहले सरकारी कर्मचारी र सुरक्षा अधिकारी लक्षित भीषण आक्रमण सुरु गरेयता अफगानिस्तानका ३४ वटा प्रान्तमध्ये २५ वटामा अझै तालिबान आतङ्ककारी समूह र सुरक्षा अधिकारीबीच भिडन्त जारी छ ।
