जनकपुरधाम । एक जना अभियन्ताले मैथिली ‘टयुटर’ नामक एपको विकास गरी मैथिली भाषालाई विश्वव्यापी गरेका छन् । बन्दाबन्दीका अवधिमा अभियन्ता अभिनव झाले सो एपको विकास गरी मैथिली भाषालाई विश्वव्यापी बनाउन सफल भएका हुन् । अभियन्ता झा सप्तरी जिल्लाको राजविराज नगरपालिकाका हुन् । अस्ट्रेलियाको लाँट्रो विश्वविद्यालयबाट दूरसञ्चार र नेटवर्क इन्जिनियरिङमा एमई गरी भारतको एउटा कम्पनीमा कार्यरत रहेका उनी बन्दाबन्दीका कारण घरबाटै कार्य सम्पादनका क्रममा सो एपको विकास गरेका हुन् ।
मैथिली टयुटर नामक एपबाट मैथिली भाषा सजिलै सिक्न सक्ने विशेषता रहेको छ भने यसबाट मैथिली भाषी लगायत अन्य भाषी समेत मैथिली भाषा सिक्न सकिनेछ । अभियन्ता झा भन्छन्, “आफू अस्ट्रेलियामा अध्ययन गरे पनि मैथिली भाषाप्रतिको अगाध आस्था र पारिवारिक सदस्य एवं समाजको सहयोग एप विकासका लागि उत्प्रेरित गरेको हो ।” एपमा मैथिली भाषाको ऐतिहासिकताबाट प्रारम्भ गरी पाँच अध्यायमा भाषा बोल्ने र सिक्ने सीप र अभ्यासको विकास गरिएको छ ।
अभियन्ताका आमा आरती झा अभिनव मैथिली भाषाको एप विकासले विश्वभरि पुर्याउनमा सफलता पाएकामा आफू गौरव महसुस गरिरहेको बताउँछिन् । अडियो, भिडियो, ग्राफिक्स र एनीमेसनको सहयोगले १५ दिनमा विकास गरिएको यस एपलाई गुगल प्लेस्टोरबाट डाउनलोड गरी मैथिली भाषा सजिलै सिक्न सक्ने बताइएको छ ।
प्रकाशित मिति: बुधबार, असोज १४, २०७७ १४:४४
