काठमाडौं । बलियो मानिएको विभागीय टोली नेपाल पुलिस क्लबले पल्सर शहिद स्मारक ए डिभिजन लिगमा मच्छिन्द्र क्लबसँग अंक बाँडेको छ । आइतबार ललितपुरको सातदोबाटोस्थित एन्फा कम्प्लेक्सको खेलमैदानमा भएको खेलमा विभागीय टिम पुलिसलाई मछिन्द्रले गोलरहित बराबरीमा रोकेको हो ।
खेलको सुरुवात देखि नै आक्रामक देखिएको पुलिसले पहिलो हाफमा मात्र तीनवटा राम्रो गोल गर्ने अवसर खेर फालेको थियो । पुलिसविरुद्ध रक्षात्मक देखिएको मच्छिन्द्रले दोस्रो हाफमा सुधारिएको खेल खेलेपनि गोल गर्न सकेन । पुलिसको गोल गर्ने प्रयास दोस्रो हाफमा पनि सफल बन्न सकेन । खेलअवधिभर बल आफ्नो नियन्त्रणमा राखे पनि गोल गर्न नसक्दा पुलिसले बराबरीमै चित्त बुझाउन पुग्यो ।
टोलीमा युवा खेलाडीको बाहुल्यता रहेको पुलिसले दोस्रो हाफको अन्तिम १० मिनेट भोला सिलवाललाई उतारेको थियो । घाइते भएका कारण भोलाले दुई बर्षदेखि राष्ट्रिय टोली गुमाउँदै आएका थिए । उनी यही लिग मार्फत फुटबलमा फेरी जम्ने प्रयासमा छन् । बराबरीसँगै पुलिसले चार अंक बनाएको छ ।
पुलिसले पहिलो खेलमा जाउलाखेललाई १–० गोलले हराएको थियो । दुवै खेलमा बराबरी नतिजा आत्मसाथ गरेको मच्छिन्द्रले दुई अंक बनाएको छ । मच्छिन्द्रले पहिलो खेलमा च्यासलसँग गोलरहित बराबरी खेलेको थियो ।
प्रकाशित मिति: शनिबार, मंसिर १, २०७५ १९:१६