काठमाडौं । आईसीसी यू–१९ विश्वकप क्रिकेटको एसियाली छनोटमा नेपालले तेस्रो जित हात पारेको छ ।
मंगलबार भएको खेलमा नेपालले ओमानलाई १ सय ५० रनले हराएको हो । टस हारेर पहिले ब्याटिङको निम्तो पाएको नेपालले ४३ दशमलव २ ओभरमा सबै विकेट गुमाएर २२९ रन बनाएको थियो ।
नेपालका लागि कप्तान रोहित कुमार पौडेलले सर्वाधिक ७५ रन बनाए भने प्रतिश जिसीले ४१ र भीम सार्कीले ३९ रनको योगदान दिए ।
जवाफमा ब्याटिङमा उत्रिएको ओमान ७९ रनमा अलआउट भयो । ओमानलाई सस्तैमा समेट्न पवन सर्राफले ३, प्रतिश जिसी र सूर्य तामाङले २–२ र कुशल मल्ल, भीम सार्की र कमल सिंह ऐरीले समान १–१ विकेट लिए ।
प्रकाशित मिति: मंगलबार, वैशाख ३, २०७६ १८:१९
