कञ्चनपुर । महाकाली नगरपालिका-१० का खडकबहादुर बस्नेतले सशस्त्र प्रहरीलाई ५ कट्ठा जग्गा दान गरेका छन् ।
उनले सुन्दरनगर र गुरुङ टोलबीचमा रहेको ५ कट्ठा जग्गा प्रहरीलाई बोर्डर आउट पोस्ट राख्न दान गरेका हुन्।
सशस्त्र प्रहरीको आग्रहअनुसार सीमा सुरक्षामा सहयोग गर्न जग्गा दान गरिएको उनले बताए।
‘सशस्त्र प्रहरी यहाँ सीमा सुरक्षाका लागि आएको छ। उहाँहरुलाई सहयोग गर्न हामी सबैको दायित्व हो’, समाजसेवी बस्नेतले भने, ‘सशस्त्रलाई भवन लगायतका संरचना बनाउन सहज होस् भनेर जग्गा सहयोग गरेका छौँ।’
उनले महाकाली नगरपालिका प्रमुख वीरबहादुर सुनार, नगर प्रवक्ता दिलबहादुर सिजाली, महाकाली-१० का अध्यक्ष नरबहादुर सुनार लगायतको रोहवरमा जग्गाको मञ्जुरिनामा दिएका हुन्।
दोधारा चाँदनी क्षेत्रमा बस्दै आएको बस्नेत परिवारले यसअघि पनि महाकाली-१० कै हरिओम आधारभूत विद्यालयलाई चार कट्ठा जग्गा दान गरेको थियो। सीमा सुरक्षाका लागि खटिएको सशस्त्र प्रहरीलाई जग्गा सहयोग गर्न बस्नेत परिवारसहित दोधारा चाँदनीका सबै बासिन्दाका लागि गर्वको विषय भएको नगर प्रमुख सुनारले बताए।
प्रकाशित मिति: आइतबार, असोज ४, २०७७ १५:२१
