बुटवल । सवारी दुर्घटनामा परी नवलपरासी पश्चिमको प्रतापपुर गाउँपालिकाका अध्यक्ष राजकुमार शर्माको मृत्यु भएको छ ।
गाउँपालिकाबाट जिल्ला विपद् व्यस्थापन समितिको परासीमा राखिएको बैठकमा सहभागी हुन गएका उनको आइतबार बर्दघाटमा भएको दुर्घटनामा मृत्यु भएको जिल्ला प्रहरी कार्यालय पश्चिम नवलरासीले जनाएकाे छ ।
दुर्घटना भएको गाउँपालिकाको गाडी उनी आफैले चलाएको प्रहरीले जनाएको छ । साइकलयात्रीलाई जोगाउन खोज्दा कल्भर्टमा गाडी ठोक्किएर दुर्घटना भएको थियो ।
गाडीले च्यापिएका उनको उपचारको क्रममा चिसापानी अस्पताल बर्दघाटमा मृत्यु भएको हो । शर्मासँगै गाडीमा रहेका प्रतापपुर गाउँपालिका वडा नम्बर ५ का हरिलाल राजभर घाइते भएका छन् । उनी खतरामुक्त रहेको प्रहरीले जनाएकाे छ ।
प्रकाशित मिति: आइतबार, जेठ ३२, २०७७ ०७:२३
