गाईघाट : उदयपुर जिल्लाको त्रियुगा नगरपालिकासहित पूर्वी क्षेत्रका सामुदायिक वनमा आगलागी भएको छ ।
नगरपालिकाको त्रिवेणी सामुदायिक वन र मोथ्याई सामुदायिक वन क्षेत्रमा व्यापक व्यापक आगलागी भएपछि अहिले जिल्ला वन कार्यालयको नेतृत्वमा स्थानीय सामुदायिक वनसहितका टोलीले आगो नियन्त्रण गर्न सुरु गरेको छ ।
सनुवा सामुदायिक वनको मोथ्याई चुरे क्षेत्रमा ३ दिनदेखि लागेको डढेलो गाउँक्षेत्रमा प्रवेश गर्ने खतरा बढेपछि जिल्ला वन कार्यालयको अगुवाइमा सामुदायिक वन, स्थानीयवासीसहित ५० जनाले २ दिन लगाएर शनिबार दिउँसोसम्ममा डढेलो पूर्णरूपमा नियन्त्रण गरेको उदयपुरका सहायक वन अधिकृत लालबाबु यादवले जानकारी दिए ।
यस्तै नगरपालिकाको त्रिवेणी सामुदायिक वन मोतिगडा चुरे क्षेत्रमा पनि २ दिनदेखि लागेको डढेलो बढ्दै गएपछि जिल्ला वन कार्यालय उदयपुरको अगुवाइमै शनिबार बिहानैदेखि दिनभरि डढेलो नियन्त्रण भइरहेको र अहिले सो क्षेत्रमा वनको कर्मचारीसहित स्थानीयवासी गरेर ४० जना डढेलो नियन्त्रणमा खटिरहेको पनि अधिकृत यादवले बताएका छन् ।
चुरे वन क्षेत्रमा लागेको डढेलो हावाहुरीले झनै फैलिँदै गएपछि चुरे क्षेत्रका गाउँ सनुवा, जोगीदह, मोथ्याई, मोतिगडा, भुल्केसहितका झन्डै १ हजार ५०० बढी घरपरिवार जोखिममा परेकाले जिल्ला वन कार्यालयको अगुवाइमा डढेलो नियन्त्रण अभियान कार्यलाई तीव्रता दिइएको वन कार्यालयले बताएको छ ।
३ दिनभित्र ५० हेक्टर बढी क्षेत्रफलको डढेलो नियन्त्रण गरिसकिएको र बाँकी क्षेत्रका डढेलो पनि नियन्त्रणमा आइसकेको सम्बद्ध पदाधिकारीले बताएका छन् ।
सुक्खा मौसम तथा हावाहुरीका कारण चुरे क्षेत्रमा घाँस, दाउरा तथा गोठाला जानेले नै सुर्तीबिँडी खाएर मनपरी फाल्नाले डढेलो लागेको हुन सक्ने सहायक जिल्ला वन अधिकृत यादवले बताए ।
प्रकाशित मिति: आइतबार, चैत ३, २०७५ १३:२९
