बैतडी । दशरथचन्द राजमार्गअन्तर्गत बैतडीको पाटनमा आइतबार बिहान जिप दुर्घटना हुँदा १ जनाकाे मृत्यु भएको छ भने अन्य ६ जना घाइते भएका छन् ।
धनगढीबाट दार्चुला जाँदै गरेको अनटेस्ट १२५७ नम्बरको जिप दुर्घटना हुँदा चालकको घटनास्थलमै मृत्यु भएको बैतडीका प्रहरी प्रमुख प्रहरी नायब उपरीक्षक डिल्लीनारायण पाण्डेयले बताए ।
सो राजमार्गअन्तर्गत पाटन नगरपालिका–६ पनतोलीमा सो जिप बिहान सडकबाट २ सय ५० मिटर तल खसेकाे थियाे ।
मृत्यु हुनेमा दार्चुलाको दुहु गाउँपालिकाका ३५ वर्षीय धनसिंह बडाल हुन् । त्यसैगरी घाइते हुनेमा दार्चुला दुहु–४ कै २३ वर्षीय सुरेन्द्र बम, ३८ वर्षीय हरकसिंह बडाल, ४१ वर्षीय प्रेमबल्लब जोशी, ४१ वर्षीय धनराज जोशी, २० वर्षीय हेमन्ती बम र २२ वर्षीया द्रोपती जोशी छन् ।
घाइतेमध्ये ४ जनाको अवस्था गम्भीर रहेको प्रहरीले जनाएको छ । दुर्घटनाको कारण खुलेको छैन । घाइतेको जिल्लामा उपचार हुन नसक्दा अन्यत्र सिफारिसको तयारी भएकोे जनाइएको छ ।
प्रकाशित मिति: आइतबार, फागुन २५, २०७६ ०४:५३
