काठमाडाैं । ललितपुरको बालकुमारीमा मोटरसाइकल दुर्घटना हुँदा २ जनाकाे मृत्यु भएकाे छ ।
साेमबार बिहान करिब सवा ४ बजे सडक किनारको रेलिङमा माेटरसाइकल ठोक्किँदा लाजिम्पाट बस्ने ३० वर्षीय दिवश किशोर भट्टराई र पछाडि बसेका अन्दाजी ३० वर्षकै ललिता राईको मृत्यु भएको महानगरीय ट्राफिक प्रहरी महाशाखाले जनाएको छ ।
ट्राफिक प्रहरी महाशाखाका अनुसार कोटेश्वरबाट ग्वार्कोतर्फ जाँदै गरेको बा ३८ प ८३५७ नम्बरको मोटरसाइकल आकाशेपुल नजिकैको रेलिङमा ठोक्किएको थियो ।
दुर्घटनामा गम्भीर घाइते भएका उनीहरुको ग्वार्कोस्थित बिएन्डबी अस्पतालमा उपचारका क्रममा मृत्यु भएको हो ।
यसैगरी, भक्तपुर नगरपालिका–९ च्यामासिंहमा आइतबार साँझ बा ३ क ३५८८ नम्बरको ट्रकको ठक्करबाट घाइते भएका भक्तपुर नगरपालिका–१० कमलविनायकका ११ वर्षीय तिलक मकाजुको मृत्यु भएको प्रहरीले जनाएको छ।
प्रहरीका अनुसार काठमाडौंको पुरानो बसपार्कमा बा ७५ प २२५० नम्बरको मोटरसाइकल अनियन्त्रित भएर दुर्घटना हुँदा गोदावरी नगरपालिका–५ लेलेका ४२ वर्षीय श्रवण तामाङ गम्भीर घाइते भएका छन् ।
प्रकाशित मिति: सोमबार, फागुन १२, २०७६ ०४:२६
