वीरगन्ज । पर्साको पटेर्वासुगौली गाउँपालिकामा आज बिहान भएको आगलागीमा परी ठूलो सङ्ख्यामा चौपायाको मृत्यु भएको छ । गाउँपालिका–२ निवासी इदुमियाँ धुनियाको गोठमा भएको आगलागीमा ५६ खसी–बाख्रा र ५० वटाभन्दा बढी परेवा जलेर मरेका छन् ।
लामखुट्टे धपाउन बालिएको घूरबाट आगो सल्केर आगलागी हुँदा ठूलो सङ्ख्यामा चौपायाको मृत्यु भएको जिल्ला प्रहरी कार्यालय पर्साले जनाएको छ ।
धुनियाको गोठमा भएको आगलागीमा परी बाख्राका पाठा १८, पाठी २६, बाख्रा आठ, विदेशबाट ल्याएका उन्नत जातको बोका २ र ५० वटा परेवाको जलेर मृत्यु भएको प्रहरी नायब उपरीक्षक गौतम थापाले जानकारी दिए । उनले आगलागीबाट धुनियाको गोठ र त्यसमा भएको सम्पूर्ण सामान जलेर नष्ट भएको बताए ।
बिहान १ बजे गोठमा भएको आगलागीबाट १५ लाख रुपैयाँभन्दा बढीको क्षति भएको प्रहरीको अनुमान छ । नेपाल प्रहरी, सशस्त्र प्रहरी, स्थानीयबासी र पोखरियाबाट गएको वारुणयन्त्रको मद्दतले आगाे नियन्त्रणमा लिइएको थियाे ।
प्रकाशित मिति: आइतबार, मंसिर १, २०७६ ०८:३३
