काठमाडाैं । मकवानपुरको भीमफेदीमा सुमो दुर्घटना हुँदा तीन जनाकाे मृत्यु भएकाे छ भने ८ जना गम्भीर घाइते भएका छन् ।
सर्लाहीबाट काठमाडाैं आउँदै गरेको सर्लाही सुमो सेवाको ना १ ज ३६४० नम्बरको सुमो भीमफेदी गाउँपालिका वडा नम्बर ६ जुडीखेतको चियानडाँडामा दुर्घटना भएकाे हाे । मृत्यु हुनेमा १० महिनाकी साम्राज्ञी माझी, ७० वर्षीय वीरसिंह वाइबा र ६० वर्षीय महेन्द्र सहनी रहेका छन् ।
काठमाडाैं-हेटौँडा छोटो मार्ग अन्तर्गत जुडीखेतको चिहानडाँडाबाट सुमोको टायर फुस्किएर दुर्घटना भएको प्रहरीले जनाएको छ। टायर फुस्किँदा सुमो सडकबाट करिब सय मिटर तल खसेको थियो ।
घाइते मध्ये १ जना बालक रहेको बताइएकाे छ। घाइते हुनेमा सर्लाही जिल्लाका जगरनाथ सहनी,राजकुमार दास, सुकदेव वाईवा, अनिता डिम्डुम, योगबहादुर डिम्डुम, सिन्धुलीका दलबहादुर हिम्डुमलगायत छन् । हेटौँडा अस्पतालमा घाइतेहरूको उपचार भइरहेको प्रहरीले जनाएको छ।
प्रकाशित मिति: शुक्रबार, भदौ २०, २०७६ २१:०२
