धादिङ । विस्थापित बस्ती रहेको धादिङकाे नीलकण्ठ नगरपालिका–१२ भदुवारमा आज बिहान ग्यास सिलिन्डर पड्किँदा चार घर जलेर नष्ट भएको छ ।
लापाबाट विस्थापित भएका र भदुवारमा सहयोगीले निर्माण गरिदिएको एक घरमा चिया पकाउन लाग्दा चुहावट भएको ग्यास सल्केर आगलागी भएको र ग्यास सिलिन्डर विस्फोट भएको हो ।
ग्यास सिलिन्डर विस्फोटबाट च्याङ्बा तामाङ र दमाइ तामाङको घर जलेर पूर्णरुपमा नष्ट भएको उद्धारमा संलग्न राजकुमार भण्डारीले बताए । यससँगै रहेका अन्य दुई घरमा पनि आंशिक क्षति पुगेको छ ।
वृद्धवृद्धा मात्र बस्ने घरमा ग्यास चुहावट भई आगलागी भएको र सोही ग्यास सिलिन्डर विस्फोट भएको जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रुपक खड्काले पुष्टि गरे । रासस
प्रकाशित मिति: शुक्रबार, भदौ २०, २०७६ १६:३७
