मेलम्ची : जिल्ला अनुगमन तथा समन्वय समिति सिन्धुपाल्चोकले तीन महिनाका लागि नदी उत्खननमा रोक लगाएको छ ।
जिल्ला समन्वय समितिको निर्णयानुसार आउँदो असार १ गतेदेखि नदी उत्खनन् गरी बालुवा, ढुंगा, ग्राभेल जस्ता नदीजन्य सामग्री निकाल्न पाइने छैन ।
सुनकोसी, इन्द्रावतीजस्ता ठूला नदीका साथै मेलम्ची, ब्रह्मायणी नदीमा अत्यधिक उत्खनन भई संकटको अवस्था आइसकेका कारण यस्तो निर्णय गरिएको जिल्ला समन्वय समितिका प्रमुख कृष्णगोपाल तामाङले जानकारी दिए ।
उनले असोजपछि पनि वातावरणीय प्रभाव मूल्यांकनले उचित ठह¥याए मात्र उत्खनन खुला गरिने र अन्यथा बन्देज कायम राख्ने बताए ।
भूकम्पपश्चात् घर निर्माणको कार्य तीव्र भई गिट्टी, बालुवाको व्यापार ह्वात्तै बढ्दा व्यवसायीहरू क्रसर उद्योगमा आकर्षित भएका थिए । शक्तिको चलखेलमा मापदण्डभित्र नपर्दा पनि अत्यधिक क्रसर उद्योग खुलेका छन् ।
क्रसर उद्योगका कारण यहाँका जलचरलाई पनि असर पारेको छ । वातावरणीय विकराल अवस्थाकै कारण जिल्ला समन्वय समितिले नदीजन्य सामग्री उत्खनन गर्दा पुनः वातावरणीय परीक्षण गर्न स्थानीय तहलाई आग्रह गरेको छ ।
दर्ता गर्न चाहने क्रसर उद्योगले वातावरणीय परीक्षण गरेर जिल्ला समन्वय समितिबाट स्वीकृत गराएर मात्र दर्ता अनुमति दिन निर्देशन दिएको प्रमुख तामाङले जानकारी दिए ।
प्रकाशित मिति: बुधबार, जेठ २९, २०७६ १३:०७
