भरतपुर : चितवनका प्रदेशसभा सदस्य विजय सुवेदीले मरणोपरान्त अङ्गदान गरेका छन् । आफ्नो ५६औं जन्मदिनको उपलक्ष्यमा उनले भरतपुर अस्पतालमा अङ्गदान गरेका हुन् । उनले मानव शरीरको अङ्ग प्रत्यारोपण ऐन २०५५ अनुसार मृत्युपश्चात् मुटु, फोक्सो, कलेजो, प्यान्क्रियाज, मिर्गौलालगायत दान गर्ने मञ्जुरीनामामा हस्ताक्षर गरेका हुन् । उनी भरतपुर अस्पतालमा अङ्गदान गर्ने पहिलो व्यक्ति हुन् ।
२०२० चैत ५ गते स्याङ्जामा जन्मिएका सुवेदी हाल भरतपुर महानगरपालिका–१२ मा बस्छन् । सांसद सुवेदीले अङ्गदानसँगै अस्पताल परिसरमा पीपलका बिरुवासमेत रोपेका छन् । उनी भरतपुर अस्पताल विकास समितिको अध्यक्षसमेत भएर काम गरिसकेका छन् ।
मृत्युपश्चात् त्यसै माटोमा मिसिने शरीरका अङ्गले दानपश्चात् धेरै मानिसलाई सुखी र खुसी जीवन बिताउन सक्ने भएकाले अङ्गदान गरेको उनले बताए । कुनै पनि मानिस अङ्गको अभावमा बाँच्न नपरोस् भन्नका लागि अङ्गदानलाई अभियानका रूपमा सञ्चालन गर्नुपर्ने उनको धारणा छ ।
मानिसले मरणोपरान्त अङ्गदानको विषयमा नबुझेकै कारण कार्यान्वयनमा चुनौती बनेको चिकित्सकले जनाएका छन् । दुर्घटनामा परेर जीवन गुमाउनेको अङ्गदान हुन सकेमा नेपालमा अङ्गको पर्खाइमा रहेका बिरामीले जीवन पाउन सक्ने चिकित्सकको सुझाव छ । ‘यसका लागि सबैमा चेतना हुनुपर्छ,’ भरतपुर अस्पतालका मेडिकल सुपरिटेडेन्ट डा. कृष्णप्रसाद पौडेलले भने, ‘पहिलोपटक यहाँ सुरुवात गरेका छौं ।’
पौडेलले मिर्गौला डायलासिस धेरै खर्चिलो रहेकाले प्रत्यारोपणमा जानुपर्ने बताए । उनले भने, ‘सरकारले हरेक प्रदेशमा एउटा मिर्गौला प्रत्यारोपण केन्द्र सञ्चालन गर्ने तयारी गरेको छ, प्रदेश नं. ३ को भरतपुर अस्पतालमा राख्न हामीले पहल सुरु गरिसकेका छौं ।’ उनले चितवनमा अङ्गदानलाई अभियानका रूपमा सञ्चालन गर्ने बताए ।
प्रकाशित मिति: बुधबार, चैत ६, २०७५ १६:२५