जनकपुर । ठूलो परिमाणमा लागुऔषधसहित प्रहरीले महोत्तरीमा १ युवकलाई पक्राउ गरेको छ ।
पक्राउ पर्नेमा एकडारा गाउँपालिका–३ अमरपट्टीका २४ वर्षीय पप्पुकुमार मण्डल रहेको जिल्ला प्रहरी कार्यालय महोत्तरीका प्रहरी उपरीक्षक श्यामकृष्ण अधिकारीले जानकारी दिए ।
सीमावर्ती भारतीय सहर भिठ्ठामोडबाट ज १२ प ८३४ नम्बरको मोटरसाइकल चढेर नेपाल आउने क्रममा नेपाल प्रहरी र सशस्त्र प्रहरीको संयुक्त टोलीले जलेश्वर नपा–६ स्थित सडकमा जाँच गर्दा ठूलो परिमाणमा लागुऔषधसहित उनलाई पक्राउ गरेको प्रहरीले जनाएको छ ।
उनको साथबाट प्रहरीले लागुऔषध प्रोमेथाजिन हाइड्रोक्लोराइड इन्जेक्सन २ एमएलको ९८ पिस, बुप्रेनोर्फिन इन्जेक्सन २ एमएलको १ सय थान, डाइजेपाम इन्जेक्सन २ एमएलको १ सय थान र इन्ट्राजेपाम ट्याब्लेट १० लेखिएको ९ सय थान बरामद गरेको जनाइएको छ ।
प्रकाशित मिति: बुधबार, मंसिर १८, २०७६ १०:५२
