भाेजपुर । जिल्लाकाे षडानन्द नगरपालिकामा अज्ञात व्यक्तिद्वारा एक महिलाको बीभत्स हत्या गरिएको छ ।
षडानन्द नगरपालिका–१ नेपालेडाँडाबाट खेल हेरेर घर फर्कंदै गरेकी वडा नम्बर ३ बस्ने २८ वर्षीया कल्पना राईको हत्या भएको जिल्ला प्रहरी कार्यालय भोजपुरले जनाएको छ ।
शनिबार साँझ षडानन्द नगरपालिकाको वडा नम्बर २ र ३ को सिमानामा पर्ने उपङ्खा भन्ने ठाउँमा धारिलो हतियार प्रयोग गरी हत्या भएको प्रहरीको भनाइ छ । हाटबाट फर्किँदै गरेका कल्पना राई र घाइते १८ वर्षीया नवीना राईमाथि धारिलो हतियार प्रयोग भएको हो ।
मृतक कल्पनाको शरीरको विभिन्न भागमा चोट लागेर घटनास्थलमै मृत्यु भएको थियो भने घाइते नवीनाको चिउँडोमा चोट लागेको प्रहरीले जनाएको छ ।
घटनामा संग्लग्न भएको आशंकामा प्रहरीले षडानन्द नगरपालिका–३ का २१ वर्षीय प्रदीप बस्नेतलाई आज बिहान पक्राउ गरेको छ । घटनाको विषयमा अनुसन्धान सुरु गरेकाे प्रहरीले जनाएकाे छ ।
प्रकाशित मिति: आइतबार, कात्तिक ३, २०७६ ०५:५०
