प्रतिक पौडेल, रुपन्देही । रुपन्देही जिल्लामा यस आर्थिक बर्षको मंसिरसम्म लागुऔषध सम्बन्धी ९७ मुद्दा दर्ता भएका छन् ।
जिल्ला प्रहरी कार्यालय रुपन्देहीका अनुसार विभिन्न मुद्दामा हालसम्म १ सय ५१ व्यक्ति पक्राउ परेका छन् ।
प्रहरीको तथ्यांकअनुसार हालसम्म २७ सय ३६ एम्पुल डाइजपाम, २९ सय ३ एम्पुल फेनरागन, २८ सय ८७ नुफिन, ८२ एम्पुल तालजेसिक, ३ सय ६७ ट्याव्लेट नाईट्रभेट, ७ सय २७ नाईट्रोसन, ६ सय ९५ स्पास्मो, ६२ हजार ८० ग्राम चरेश, ६२ हजार ६ सय ९५ मिली ग्राम ब्राउनसुगर, १० हजार ८ सय एमएल कोरेक्स्, ११ हजार ४ सय ३२ ग्राम गाँजा, १ सय ८१ एम्पुल सैरेजेसिक, २ सय २६ ट्याव्लेट रिड्ले, ९३ ट्याव्लेट वोकहैड बरामद गरिएको छ ।
रुपन्देहीका प्रहरी प्रमुख हृदय थापाले आफूहरुले सेवन गर्ने भन्दा पनि कारोबार गर्ने लागुऔषध माफियाहरुलाई पक्राउ गर्न कोशिस गरिरहेको बताए । उनले भने, ‘भारतीय पक्षसँग सहकार्य गरेर ब्राउनसुगर जस्ता लागुपर्दाथ रोकथाम गर्न आफुहरु केही हदसम्म सफल भएपनि डाईजेपाम, फेनरागन, नुफिन, नाईट्राभेट लगायत भारतको ऐनमा वैध मानिएको तर नेपालमा गैरकानुनी रहेकोले त्यसलाई रोक्न कठिन भएको छ ।’
पछिल्लो समय रुपन्देही प्रहरी लागुऔषध कारोबार गर्ने नाइकेहरुलाई पक्राउ गर्न लागिपरेको देखिएको छ । बिहिबार मात्र प्रहरीले भैरहवाको गल्लामण्डी बाट ३ हजार एम्पुल डाईजेपाम, नुफिन र फेनारगन सहित लागुऔषध कारोबारीलाई पक्राउ गरेको थियो । नवलपरासी रामग्राम नगरपालिका वडा नं १८ बस्ने २७ बर्षिय दुर्गा प्रसाद चौधरीलाई प्रहरीले बिषेश सूचनाका आधारमा सिद्धार्थनगर नगरपालिका वडा नं ४ बाट पक्राउ गरेको थियो ।
प्रहरीले दिएको जानकारी अनुसार चौधरी लागु औषधको ठुलै कारोबारी रहेको र उनले गल्लामण्डी बसेर सेवनकर्ताहरुलाई लागुऔषध बेच्ने गरेको पाईएको थियो । चौधरीको साथ बाट स्याउको कार्टुन भित्र लागुऔषधमाथि स्याउले ढाकेको अवस्थामा ३ हजार एम्पुल लागुऔषध फेला परेको थियो ।
चौधरीलाई जिल्ला अदालत रुपन्देहीबाट म्याद थप गरेर हिरासतमा राखि मुद्दा चलाइएको छ । चौधरीको बयान अनुशार थप दुई जना कारोबारी यसमा संलग्न रहेकोले यस बिषयमा अनुसन्धान भैरहेकोले छिट्टै नै अरु पनि पक्राउ पर्ने जानकारी जिल्ला प्रहरी कार्यालय रुपन्देहीले दिएको छ ।
प्रकाशित मिति: आइतबार, पुस १, २०७५ १९:१६
