काठमाडौं । सत्तारुढ नेकपानिकट दुई विद्यार्थी संगठनहरु अनेरास्ववियु र अनेरास्ववियु (क्रान्तिकारी) ले देशकै अग्रणी विश्वविद्यालय सुधारका निम्ति उपकुलपतिलाई ज्ञापनपत्र बुझाएका छन् ।
त्रिविले सञ्चालन गर्दै आइरहेको प्राइभेट परीक्षा बिना विकल्प बन्द हुँदा धेरै विद्यार्थी मारमा पर्ने भएकाले तुरुन्त परीक्षा दिने व्यवस्था कायम गर्न आग्रह गर्दै विद्यार्थी संगठनहरुले सेमेष्टर लगाउने र प्राइभेट फर्म बन्द गर्ने कदम एकैचोटि चाल्दा स्नातकोत्तर अध्ययन गर्न इच्छुक हजारौं विद्यार्थी मर्कामा परेको भन्दै यस्तो गलत निर्णय सच्याउन दबाव दिएका छन् ।
त्रिविका पदाधिकारीहरुको गैरजिम्मेवार भूमिका नैं विश्वविद्यालय ध्वस्त बनाउने प्रमुख कारक रहेको उल्लेख गर्दै उनीहरुले त्रिविको पाठ्यक्रम, अध्ययनविधि, शूल्क, परीक्षा प्रणाली, गुणस्तर, छात्रवृत्ति, शौचालय, ल्याब र खेलमैदान लगायतका विषयमा धेरैपटक छलफल गरेपनि अवस्था नफेरिएको विज्ञप्तिमा उल्लेख गरेका छन् ।
अनेरास्ववियुका कार्यवाहक अध्यक्ष रश्मि आचार्य र क्रान्तिकारीका अध्यक्ष रञ्जित तामाङद्वारा हस्ताक्षरित विज्ञप्तिमा विभिन्न १७ वटा मागहरु समावेश गरिएका छन् ।
विद्यार्थी संगठनहरुले स्ववियु निर्वाचनको मिति तत्काल सार्वजनिक गर्नुपर्ने, नीजि कलेजलाई सम्बन्धन दिँदा स्थापित मान्यताहरु आत्मसाथ गर्नुपर्ने, अनुसन्धान केन्द्रहरुको प्रभावकारिता बढाउनुपर्ने, सेमेष्टर प्रणालीलाई व्यवस्थित गर्नुपर्ने, मेडिकल शिक्षामा विद्यार्थीको सहज पहुँच बढाउनुपर्ने लगायतका मागहरु राखेका छन् ।
ज्ञापनपत्र बुझाउने क्रममा अनेरास्ववियु तथा अखिल (क्रान्तिकारी) का नेता तथा कार्यकर्ताहरुको सहभागिता रहेको थियो ।
प्रकाशित मिति: आइतबार, मंसिर २३, २०७५ १९:१६