काठमाडौं । महिला मानवअधिकार रक्षकहरुको राष्ट्रिय संजालले देशभर संचालन गरिरहेको बलात्कार बिरुद्धको राष्ट्रिय अभियानकै क्रममा काठमाडौ जिल्ला संजालले आज काठमाडौका प्रमुख जिल्ला अधिकारी रामप्रसाद आचार्य मार्फत प्रधानमन्त्रीलाई ध्यानाकर्षण पत्र बुझाएको छ ।
काठमाडौ जिल्ला संजालमा आवद्ध महिला मानवअधिकार रक्षकहरुले पठाएको ध्यानाकर्षण पत्रमा दिनमा ४ वटा भन्दा बढी बलात्कार, बलात्कारका प्रयास र बलात्कार पछि हत्या भईरहेको र निर्मला पन्तको बलात्कार पछि हत्याभएको घटनामा देश भर दवाव हुँदापनि न्याय प्राप्तीमा कठिनाई भएको भन्दै, “लोकतान्त्रिक देशमा जनतालाई न्याय प्राप्त गर्न यति कठिनाई हुनु भनेको लोकतान्त्रिक व्यवस्था कमजोर हुनु भएको तर्फ जोड दिईएको छ ।
त्यस्तै महिलामानवअधिकार रक्षकहरुले महिला र बालबालिकाले न्याय प्राप्तीमा भएका यस्ता कठिनाईका कारण देशमा स्थायित्व र समानताको हक सुनिश्चित हुनसक्ने वातावरण बन्न नसक्ने भन्दैै यो स्थिति परिवर्तन गर्नका लागि गर्नुपर्ने मुख्य कार्यहरुका लागि चौध बुँदे माग सहितको ध्यानाकर्षण समेत पत्र बुझाएका छन् ।
ध्यानाकर्षण पत्र बुझ्दै प्रमुख जिल्ला अधिकारी आचार्यले दिनहुँ घटिरहेका बलात्कार लगायत महिला हिंसाका घटनालाई सम्बोधन गर्न जिल्ला प्रशासन कार्यालयले विशेष अभियान संचालन गरिरहेको र त्यसमा महिलाअधिकार रक्षकहरुसगँ पनि सहकार्य गरेर जान सकिने बताउँदै ध्यानाकर्षण पत्र आइतबार नै प्रधानमन्त्री कार्यलय पठाईने जानकारी दिए ।
प्रकाशित मिति: शनिबार, मंसिर २२, २०७५ १९:१६
