कञ्चनपुर । नेपाल–भारत मैत्री सेवाअन्तर्गत महेन्द्रनगरदेखि देहरादुनसम्म बस सेवा सुरु भएको छ ।
शनिबार सुदूरपश्चिम प्रदेशका वन तथा वातावरण राज्यमन्त्री प्रकाश रावल र भारत उत्तराखण्ड राज्यका विधायक पुष्करसिंह धामीले संयुक्त रूपमा बस सेवाको उदघाटन गरेका छन् । राज्यमन्त्री रावल र विधायक धामीले हरियो झन्डा देखाउँदै रिबन काटेर बस सेवाको सुरुवात गरेका हुन् ।
मैत्री बस सेवा उदघाटनका क्रममा मन्त्री रावलले देहरादुनमा नेपाली भाषीहरूको बसोवास रहेकाले यस सेवाले आपसी व्यापार, व्यवसाय, रोजगार र पर्यटन क्षेत्रको विकासमा सहयोग पुर्याउने बताए ।
उत्तराखण्ड राज्यका विधायक पुष्करसिंह धामीले बस सेवाले दुई देशबीचको मित्रतालाई अझ प्रगाढ बनाउने भन्दै सुदूरपश्चिम र उत्तराखण्डमा रहेको धार्मिक रीतिरिवाज र रहनसहनको एकतालाई अझ बलियो बनाउन बस सेवा महत्वपूर्ण हुने बताए ।
सेवा सुरुभएसँगै अब महेन्द्रनगर र देहरादुनबाट दैनिक २/२ वटा बस चल्नेछन् । दुवैतर्फबाट हरेक दिन सांँझ बस छुट्ने समयतालिका रहेको छ । महेन्द्रनगरदेखि ३ सय ७० किलोमिटरको दूरीमा रहेको देहरादुनसम्मका लागि १ हजार २५ रुपैयाँ (भारु ६ सय २५) टिकट निर्धारण गरिएको छ ।
प्रकाशित मिति: शनिबार, मंसिर २२, २०७५ १९:१६
