अछाम । अछाम जिल्लाको पञ्चदेवल विनायक नगरपालिकास्थित एक माध्यमिक विद्यालयमा लाखौंको बेरुजु रकम रहेको खुल्न आएको छ ।
जिल्लाको विद्या मन्दिर माविमा २८औं अभिभावक भेलाबाट गठित छानबिन समितिले गरेको अध्ययनबाट १५ लाख ७४ हजार २ सय ६२ बराबरको रकम बेरुजु देखिन आएको हो ।
छानबिन समितिले विभिन्न ६ शीर्षकमा छानबिन गरेको हो । जसअनुसार समितिले विद्यालयको २ कोठे भवन निर्माण, माछापोखरी निर्माण तथा जग्गा कटान, सम्पूर्ण खरिदका बिलभरपाइहरु, नगद मौज्दात, प्राविधिक खर्च एवम् नमूना विद्यालय तथा विद्यालय व्यवस्थापन समितिले गरेका विभिन्न निर्णयहरुमाथि छानबिन गर्दा सो बेरुजु फेला परेको देखिएको छ ।
विद्यालय व्यवस्थापन समितिका निबर्तमान अध्यक्ष शेरबहादुर बुढासमेत रहेको ३ सदस्यीय समितिले शाही ट्रेडर्स विनायक अछामकाे नाममा १ लाख २९ हजार ९६२, प्रधानाध्यापक वीरबहादुर शाहीका नाममा १ लाख १२ हजार, २ कोठे भवन निर्माणको जिम्मा लिएका पहलसिंह धामी, विव्यस र प्रशासनका नाममा संयुक्त ५ लाख ७६ हजार, जग्गा कटानको जिम्मा लिएका लाल बहादुर रावलको नाममा ६ लाख ५० हजार र विद्यालयका कर्मचारी हेमन्त रावलको नाममा १ लाख ६ हजार ३ सय गरी कूल १५ लाख ७४ हजार २६२ रुपैया बेरुजु सार्वजनिक गरेको छ ।
निबर्तमान अध्यक्ष एवम् छानबिन समिति सदस्य बुढाले आजको न्युजलाई बताए अनुसार विद्यालयमा प्रशासनले व्यापक आर्थिक लापरबाही गरेको देखिएको छ । बुढाले विद्यालयमा भदौका बिलभरपाइहरु असारमा फर्छ्यौट गरिएको, भ्याट बिल प्रयोग नगरिएको र आर्थिक पारदर्शिताको कुनै मतलब नगरेको देखिएको बताए ।
विद्यालयको २८औं अभिभावक भेलाले सालेपको आर्थिक प्रतिवेदन चित्त नबुझेको भन्दै अस्वीकृत गरेपछि सोही भेलाले छानबिन समिति गठन गरेको थियो । उक्त छानबिन समितिले मंसिर १४ गतेको विशेष अभिभावक भेलामा उल्लेखित बेरुजु सार्वजनिक गरेको हो ।
प्रकाशित मिति: बिहीबार, मंसिर १३, २०७५ १९:१६