प्रतिक पौडेल, भैरहवा । भैरहवास्थित भीम अस्पतालले अवैध रुपमा पार्किङ शुल्क उठाउँदै गरेको पाइएको छ । अस्पतालले विगत ६ महिनादेखि केही व्यक्तिसँग मासिक १ हजार लिएर गैरकानुनी रुपमा पार्किङ शुल्क उठाउन दिएको हो ।
बिना कुनै सम्झौता सरकारी अस्पताल परिसरभित्र यसरी पार्किङ शुल्क उठाउनु कानुनी रुपमा गलत कार्य भएको र पार्किङ शुल्क लिने तर रसिद नदिने क्रियाकलाप भएपछि स्थानीयवासी र सेवाग्राहीले गुनासो पोख्दै आएका छन् ।
यसबारे अस्पताल प्रशासनसँग बुझ्दा मेशु अनन्त शर्मा कार्यालय प्रमुख रहँदा दुईपटक सम्म टेन्डर आह्वान गर्दा पनि कोही नआएपछि यसरी व्यक्तिलाई शुल्क उठाउन दिइएको हो । व्यक्तिलाई पार्किङ शुल्क उठाउन दिएपनि कुनै लिखित सम्झौता गर्ने र रसिद दिने काम भने आस्पतालले गरेको छैन ।
अस्पताल भने बिना सम्झौता रसिद दिन नमिल्ने भएकाले रसिद नदिएको बताउँछ । अस्पतालमा हाल नियुक्त भएर आएका कार्यालय प्रमुख मेशु डा. राजेन्द्र जिसी भन्छन्, ‘बिना सम्झौता यसरी पार्किङ शुल्क उठाउनु गलत कार्य भएकोले यसलाई यथाशिघ्र रोकेर टेन्डर खुलाइने छ ।’ उनले टेन्डर खुलाउदा कोही नआए व्यक्तिलाई दिँदा सम्झौता गरी रसिद सहित दिइने बताए ।
अस्पतालमा दैनिक ५ देखि ६ सय रुपैया पार्किङवापत उठ्ने गरेको हुन्छ । साइकल राखे बापत ५ र मोटरसाइकल राखे बापत १० रुपैया उठाउने गरिएको छ । अस्पतालले पुरानो पार्किङ स्थल साँघुरो भएपछि ठूला गाडी पनि पार्क गर्न मिल्ने गरी नयाँ पार्किङ स्थल निर्माण गरेको छ ।
प्रकाशित मिति: सोमबार, मंसिर १०, २०७५ १९:१६
