काठमाडौं । भूकम्पपछि पानीको मुहान सुक्न थालेपछि राजधानीको उत्तरपश्चिमी क्षेत्रमा रहेको चन्द्रागिरि नगरपालिका–१ का स्थानीयवासी बसाइँ सर्न बाध्य भएका छन् ।
साविकको दहचोक गाविस–५ मा पानीका तीनवटा मुहान सुकेका छन् । इन्द्रजात्राका समयमा भव्य मेला लाग्ने पुरातात्विक, सांस्कृतिक, धार्मिक, ऐतिहासिक र पर्यटकीय दृष्टिले महत्वपूर्ण इन्द्रदहमा तीन वर्षदेखि ट्यांकरको पानी हालेर मेला सञ्चालन गर्नु परेको छ ।
भूकम्पले भत्किएको घर बनाउन लाभग्राही सूचीमा सूचीकृतले दुई किस्ता पाए पनि तेस्रो किस्ता रोकिएको स्थानीयको गुनासो छ । पानीको समस्याका कारण अर्को स्थानमा घर बनाउँदा दोस्रो किस्ता पाए पनि इञ्जिनीयरले तेस्रो किस्ता रोकेको उनीहरुको भनाई छ ।
इन्द्रदहमा पानी सुकेपछि हाल पोखरी रित्तिएको छ । इन्द्रजात्रामा ट्यांकरले थोरै पानी हाले पनि अप्ठ्यारो सडक र भौगोलिक अवस्थाका कारण निरन्तर हाल्न नसकिएको उनले बताए ।
विसं २०७२ वैशाख १२ गतेपछि सुकेको पानी गत साउन अन्तिम साता थोरै पलाए पनि पर्याप्त नभएको वडा कार्यालयले जनाएको छ । खानेपानीकै अभाव भएपछि स्थानीय अन्यत्र बसाइँ सर्न बाध्य भएका हुन् ।
प्रकाशित मिति: बिहीबार, मंसिर ६, २०७५ १९:१६
