प्रतिक पौडेल, भैरहवा । नेपाल सरकारको नीतिअनुसार भैरहवा मालपोत कार्यालयमा अनलाइन प्रणाली ल्याइएको भएपनि कर्मचारी दक्ष नहुँदा सेवा प्रवाहमा समस्या उत्पन्न भएको छ ।
कार्यालयमा अनलाईन प्रणाली आएपनि कर्मचारी दक्ष नहुदा काम प्रभावित भएको छ । अरु बेला दैनिक ८० वटा राजीनामा स्वीकृत हुने मालपोतमा अहिले भने १०/१५ वटा मात्र काम हुने गरेको छ ।
कार्यालय प्रमुख शिव प्रसाद रेग्मीले अहिले सुरुवाती चरणमा केही समस्या देखिए पनि आउने दिनमा काम सहज हुने जानकारी दिए । रेग्मीका अनुसार १५ दिनसम्म समस्या हुने भएपनि त्यसपछि सहजरुपमा काम अघि बढ्नेछ ।
कार्यालय प्रमुखले काममा सहजता ल्याउने कुरा गरिरहे पनि जनतामा भने आक्रोश बढिरहेको छ । सिद्धार्थनगर नगरपालिका वडा नं १२ निवासी सुमन न्यौपाने इन्टरनेट प्रविधि पनि उस्तै र कर्मचारी पनि नजान्ने हुँदा समस्या सिर्जना भएको बताउछन् ।
यस्तै, बुटवल–१० निवासी टंक नाथ अधिकारी भन्छन्, ‘नया प्रविधिमा जाने राम्रो कुरा भएको तर त्यसलाई कार्यन्वयन गर्न नसक्नु कमजोरी हो ।’
‘काम गर्न मालपोत धाएको ५ दिन भयो । सिस्टमको कमजोरी हो कि कर्मचारी, कसको हो केही थाहा भएन ।’, तिलोत्तमा नगरपालिका १६ कोटिहवा निवासी लेखनाथ पराजुलीले भने ।
सुद्धोधन ७ मधुबनीका स्याम बहादुर चौधरी कर्मचारीले ब्यवहार राम्रो नगरेको बताउदै भन्छन्, ‘कर्मचारीले हामी माथी भेडाबाख्रा जस्तो ब्यवहार गरेको पाइयो ।’ यस्तै गुनासो छ, लुम्बिनी सांस्कृतिक नगरपालिका वडा नं २ निवासी जय प्रकाश पाण्डेको । उनी कर्मचारीले ढिलो काम गरेको र त्यसको सुनवाई नभएको बारे असन्तुष्ट देखिए ।
कर्मचारीको काम र ब्यवहारमा आम जनताले प्रश्न गर्दा कर्मचारीलाई भने कुनै फरक नै नपरेको देखिएको छ । उनीहरुको कामको गति र ब्यवहार दुइटैमा त्रुटी देखिन्छ ।
कार्यलय प्रमुख शिवप्रसाद रेग्मी भन्छन्, ‘राज्यले अनलाईन प्रविधिमा काम गर्ने भनिसकेपछि पछाडि हट्ने कुरै हुदैन । समय दिनुहोस् काममा सहजता आउने छ, काम नगर्ने कर्मचारीको बिदाई हुनेछ ।’
संचारकर्मीलाई उल्टै प्रश्न गर्छन् कर्मचारी
काम नभएर छटपटिएका जनताको आक्रोश एकातर्फ छ, अर्कोतर्फ काम नजानेर टोलाएका कर्मचारी । कर्मचारी कम्युटरमा त छन् काम भने भएको छैन । बाहिर जनता नक्सा र कागज पत्र लिएर प्रतिक्षामा भने बसिरहेका छन् ।
आजको न्युजले यसबारे भित्रका केही कर्मचारीसँग बुझ्दा कार्यालयमा कार्यरत कम्युटर अपरेटर र विभागबाट खटिएर अनलाईन प्रणाली संचालन गर्न आएका अधिकारीले काम नगर्दा यस्तो समस्या आएको पाइयो । यस्तै, कर्मचारीले कार्यालय प्रमुखलाई पनि अटेर गरेको अवस्था देखियो । सञ्चारकर्मी त्यहाँ पुग्दा पनि कर्मचारीको ब्यवहार भने उस्तै देखिएको छ । मानौं उनीहरुलाई कोही कसैको डर नै छैन । सञ्चारकर्मीलाई प्रश्न गर्छन्, ‘किन फोटो खिचेको ? यसरी यहाँ फोटो खिच्न पाइदैन ।’
सेवाग्राहीलाई भड्काउँदै लेखापढी ब्यवसायी
कुनै पनि कार्यालय डिजिटल प्रणालीमा जानु धेरै नै राम्रो कुरा हो । डिजिटल प्रणालीसँगै कर्मचारीको कार्यप्रस्तुति र ब्यवहारमा पनि परिवर्तन हुन जरुरी हुन्छ । भैरहवा मालपोत कार्यालयमा अनलाईन प्रणाली आएपछि स्वतःस्फुर्त रुपमा नचल्नुका पछाडि विविध कारण छन्, जसको प्रमुख कारणमा दक्ष जनशक्तिको कमी नै रहेको छ ।
कार्यालय प्रमुखले केही समयमै छिटो काम हुने प्रतिबद्धता पनि जनाएका छन् तर यही समस्यालाई अनलाईन प्रविधिमाथि प्रहार गर्ने सुवर्ण अवसर ठानी लेखापढी ब्यवसायी भने आम जनतालाई भ्रमित गर्न पछि परेका छैनन् ।
अनलाईन प्रविधि संचालनमा आएपश्चात् लेखापढी ब्यवसायीको ब्यवसाय नै धरापमा आउने भएपछि उनीहरु त्यसको बिरुद्ध देखिएका छन् । अनलाईन प्रणालीमा जग्गासम्बन्धी काम गर्दा जग्गाधनी अनिवार्य उपस्थित हुनपर्ने बाध्यता र कागजी काम सबै अनलाईनमै हुने ब्यवस्था रहेकोले लेखापढीको अवश्यकता कम हुने गर्दछ । यही समयको मौका छोपी उनीहरु सेवाग्राहीलाई भड्काएर आन्दोलन सम्मको योजनामा पुगेका छन् ।
प्रकाशित मिति: आइतबार, मंसिर २, २०७५ १९:१६
