प्रतिक पौडेल, लुम्बिनी । लुम्बिनीमा महासमय शुत्र पाठ गर्दै अन्तराष्ट्रिय स्तरको त्रिपिटक वाचन नेपालमै पहिलो पटक शुरु भएको छ । भगवान गौतम बुद्धले शाक्य र कोलिय राज्य बिच पानीको लागि युद्ध चलिरहदा कपिलबस्तु राज्यमा युद्ध समाप्तिका लागि आफ्ना पिता राजा शुद्धोधनलाई ज्ञान दिने क्रममा महासमय शुत्र पाठ गरेको हुनाले यो शुत्र पाठ गरी त्रिपिटक वाचन शुरु गरिएको हो ।
कात्तिक ३० गतेसम्म हुने कार्यक्रममा त्रिपिटकका विनय पिटक, सुत्र पिटक र अभिधम्म पिटकको वाचन हुनेछ । बुधबार भएको उद्धघाटन कार्यक्रममा नेपालसहित करिब १८ देशका १००० भन्दा बढि भिक्षु, भिक्षुणी, उपासक, उपासिका र स्थानियहरुको उपस्थिति रहेको थियो । त्रिपिटक वाचन कार्यक्रम शुरु हुनअघि लुम्बिनीमा रहेको शान्ती दिप देखि सबैको सहभागितामा र्याली गरी मायादेवी मन्दिरको परिक्रमा गरेर कार्यक्रम स्थलमा गएर कार्यक्रम शुरु भएको थियो ।
पन्ध्र बर्षदेखि लगातार भारतको बोधगयामा हुदै आएको त्रिपिटक वाचन नेपालमा आजसम्म एकपटक पनि हुन सकेको थिएन । बौद्ध ग्रन्थको ३ दिने त्रिपिटक वाचन समारोह बुद्धको जन्मभूमि लुम्बिनीमा पहिलो पटक भएको हो ।
अमेरीकन बुद्धिष्ट एशोसिएसन, अखिल नेपाल भिक्षु महासंघ, थाई बुद्ध विहार लुम्बिनीको संयुक्त आयोजनामा कार्यक्रम भएको हो ।
कार्यक्रमको जानकारी दिने क्रममा अखिल नेपाल भिक्षु महासंघ अध्यक्ष भिक्षु मैत्रेले बुधबार पहिलो दिन हुने त्रिपिटक वाचनमा महासमय बाट शुरु गरी थाइ, श्रिलंकन, लाओसियन, बर्मिस भन्ते बाट वाचन हुने कार्यक्रम रहेको बताए । यसैगरी बिहिवार दोस्रो दिन नेपाली भिक्षुहरु बाट बिहान ८ बजे देखी वाचन हुने र ११ बजेपछि हिमालयन, चाइनिज, जापानिज, कोरियन, भ्यतनामिस मन्कस बाट वाचन हुनेछ । त्यसैगरी शुक्रबार अन्तिम दिन थाइ भन्ते बाट शुरु हुने र ११ बजे पछी नन्स हरुले वाचन गर्ने छन् । अन्तिम दिन करिब साढे ३ बजे धन्यवाद ज्ञापन पछी बत्ति बालेर मायादेवी मन्दिर परिक्रमा गरि त्रिपिटक वाचन कार्यक्रम समापन हुने जानकारी भिक्षु मैत्रेले दिए ।
बुधबार भएको उद्धघाटन कार्यक्रममा बरिष्ठ भिक्षु भन्ते प्रधमबोधीभोगं, मैत्रे महाथेरो, भिख्खु बोदिशेना, डा. लाम, शि जुङ योङ, आन्नद लगायतको उपस्थिती रहेको थियो । कार्यक्रमको अतिथिमा थाइल्यान्डका राजदुत भाकाभाट तनासकुल, लुम्बिनी बिकास कोषका उपाध्यक्ष भिक्षु मैत्रे, राष्ट्रिय सभा सदस्य दुर्गा उपाध्याय, प्रदेश सभा सदस्य फकरुद्धिन खान, लुम्बिनी सांस्कृतिक नगरपालिका मेयर मन मोहन चौधरी, देवदह नगरपालिका मेयर हिरा केसी लगायतको उपस्थिति रहेको थियो ।
प्रकाशित मिति: बुधबार, कात्तिक २८, २०७५ १९:१६