काठमाडौं । छठ पर्वको दोस्रो दिन सोमबार घरघरमा खरना मनाईंदै छ । आराध्यदेव सूर्यको पूजा उपासना गरी मनाइने छठ पर्वअन्तर्गत आज साँझ सख्खरले बनाईएको खीर षष्ठी मातालाई चढाई खरना मनाउने गरिन्छ ।
खरनाका दिन गाईको गोबरले लिपपोत गरी अरबा चामलको पिठोबाट तयार पारिएको झोलले भूमि सुशोभित गरी दिनभर उपवास बस्ने गरिन्छ ।
साँझको समयमा चन्द्रोदय भएपछि चन्द्रदर्शन गरी आँगनमा गाईको गोबरले लिपपोत गर्ने र चावलको झोलले सुशोभित गरी माता षष्ठीको पूजापाठ प्रसाद ग्रहण गर्ने गर्छन् ।
यस दिनको नैवेद्य चढाउने बेलामा जतिवटा अर्घदान गरिने हो, त्यतिवटा स्थानमा केराको पातमाथि नैवेद्य चढाउने गरिन्छ । यसरी चढाइने नैवेद्यमा खीर, दूध, केरा मूला, पान र सुपारी आदि राखिन्छन् ।
नैवेद्यलाई केराको पातमा राखेर छठीमातालाई चढाइन्छ । नैवेद्यलाई उत्सर्ग गरिसकेपछि व्रती र परिवारजनले प्रसाद ग्रहण गर्छन् ।
प्रकाशित मिति: आइतबार, कात्तिक २५, २०७५ १९:१६
