कञ्चनपुर । कञ्चनपुरको शुक्लाफाँटा नगरपालिका– ८ मा मंगलबार राति छावासहितको पोथी बाघले आक्रमण गरी नौ वटा गाई मारेको छ ।
स्थानीय वैजनाथ सामुदायिक वन क्षेत्रमा व्यवस्थित गर्न राखिएका छाडा गाईमाथि बाघले आक्रमण गरी मारेको वडा अध्यक्ष बहादुरसिंह महराले बताए ।
‘बाघले दिउँसोसमेत वन क्षेत्रमा चर्न पठाइएका गाईमाथि आक्रमण गरी मार्न थालेको छ,’ उनले भने, ‘राति गाई राखेकै ठाउँमा छिरेर ठूलो नोक्सानी पुर्याउन थालेको छ ।’ बाघ भगाउनका लागि गोठाला राखिएका भए पनि गाई जोगाउन निकै मुश्किल हुन थालेको उनले बताए ।
डमरुसहितको बाघ भएकाले भगाउन खोजे पनि भाग्नुका साटो उल्टै गोठालामाथि आक्रमण गर्न आउने गरेको छ । दुई साताअघि पनि ११ वटा गाई एकैरात बाघले मारेको थियो ।
नगरपालिका क्षेत्रमा छाडा छाडिएका गाई व्यवस्थापनका लागि सामुदायिक वनमा राखिएको छ । सामुदायिक वनका तीन ठाउमा झण्डै एक हजार गाईलाई राखिएको जनाइएको छ ।
प्रकाशित मिति: मंगलबार, कात्तिक २०, २०७५ १९:१६
