प्रतिक पौडेल, लुम्बिनी । गौतम बुद्धको जन्मस्थल लुम्बिनीमा नेपालमै पहिलो पटक हुन लागेको अन्तर्राष्ट्रियस्तरको त्रिपिटक वाचनका लागि तयारी तीब्र पारिएकाे छ । कार्यक्रमका लागि भोजन, आवास, यातायात ब्यवस्थापन लगायत कार्य अन्तिम चरणमा पुगेको आयोजक संस्था अखिल नेपाल भिक्षु महासंघले जनाएको छ ।
पन्ध्र बर्षदेखि लगातार भारतको बोधगयामा हुदै आएको त्रिपिटक वाचन नेपालमा आजसम्म एकपटक पनि हुन सकेको थिएन । बौद्ध ग्रन्थको ३ दिने त्रिपिटक वाचन समारोह बुद्धको जन्मभूमि लुम्बिनीमा हुनेछ । त्रिपिटक वाचनमा बुद्ध वचनको संग्रह त्रिपिटकअन्तर्गतका विनय पिटक, सूत्र पिटक र अभिधम्म पिटकको वाचन हुनेछ ।
त्रिपिटक वाचनबारे धेरै नेपाली अनभिज्ञ रहेको र बौद्ध धर्ममा यसको बिशेष महत्व रहेको कारण नेपालमै पहिलो पटक त्रिपिटक वाचन गर्न लागिएको हो । यसका लागि १८ देशका ७ सय भन्दा बढी बौद्ध भिक्षु, भिक्षुणी, उपासक र उपासिका लुम्बिनी आउदैछन् ।
अखिल नेपाल भिक्षु महासंघका अध्यक्ष एवं आयोजक भिक्षु मैत्री महास्थवीरले त्रिपिटक भगवान गौतम बुद्धले दिएको ज्ञान र शिक्षाको सार संग्रहित ग्रन्थ भएको बताए ।
त्यसैगरी आयोजक संस्थाका स्थानीय सचिव चेतन पन्तले ३ दिन चल्ने त्रिपिटक वाचन कार्यक्रमले लुम्बिनीको अध्यात्मिक विकास र पर्यटकको बसाइ लम्ब्याउन त्रिपिटक वाचन समारोह महत्वपूर्ण हुने बताए ।
अमेरिकन बुद्धिष्ट एसोसियसन, अखिल नेपाल भिक्षु महासंघ, थाई बुद्ध बिहारको संयुक्त आयोजनामा हुने कार्यक्रम आगामी कार्तिक २८ देखि ३० गते सम्म चल्ने छ ।
महासंघका अनुसार पहिलो दिनको त्रिपिटक वाचन थाई भिक्षुको नेतृत्वमा, दोस्रो दिनको वाचन महायानी अथवा हिमाली लामा भिक्षुको नेतृत्वमा र तेस्रो दिनको वाचन थाई भन्तेको नेतृत्वमा हुनेछ । तेस्रो दिनको पाठ सकिएपछि सहभागी सबैका तर्फबाट मायादेवी मन्दिरमा शान्ति पदयात्रासहित दीप प्रज्वलनपछि कार्यक्रम सकिने महासंघले जनाएको छ ।
प्रकाशित मिति: सोमबार, कात्तिक १९, २०७५ १९:१६