चितवन । नारायणगढ–मुग्लिङ सडक खण्डमा सवारीको गति मापन गर्न प्रहरीले राडार गन प्रयोग गर्ने भएको छ । ३६ किलोमिटर सडक चौडा र स्तरोन्नति भएसँगै तीब्र गतिमा सवारी चलाउने र ओभटेक बढी हुन थालेपछि प्रहरीले कारबाही अभियान सुरु गरेको हो ।
आइतबार प्रमुख जिल्ला अधिकारी जितेन्द्र बस्नेतको नेतृत्वमा गएको टोलीले सडकको स्थलगत अनुगमन गरेको थियो । सो क्रममा तीव्र गतिमा सवारी चलाउने, मापसे गरेर चलाउने र ओभरटेक गर्ने ३५ जना चालकलाई नियन्त्रणमा लिइएको थियो ।
उक्त सडकमा अहिले सबै क्षेत्रमा बार बनिनसकेको, पुलसमेत जीर्ण रहेको र माथिबाट पहिरो खस्ने हुँदा जोखिम कायमै छ ।
जिल्ला ट्राफिक प्रहरी कार्यालय चितवनका अनुसार यस सडकखण्डमा ‘समय कार्ड’ उपलब्ध गराएर गाडी पास गराउने तयारी गरिएको छ । यसले दुर्घटना न्यूनीकरणमा सहयोग पुग्ने प्रहरीको भनाइ छ ।
प्रकाशित मिति: बुधबार, मंसिर १९, २०७५ १९:१६
