काठमाडौं । सातौं राष्ट्रिय कर दिवस आजबाट ‘करः समृद्ध नेपाल, सुखी नेपालीको भर’ भन्ने मूल नारा साथ मनाउन लागिएको छ ।
कर दिवसको अवसरमा प्रधानमन्त्री केपी शर्मा ओलीले सम्पूर्ण करदाता र कर संकलन तथा व्यवस्थापनमा संलग्न राष्ट्र सेवक कर्मचारीहरुलाई शुभकामना दिएका छन् ।
प्रधानमन्त्रीले कर दिवसले सम्पूर्ण नेपाली दिदीबहिनी तथा दाजुभाइलाई असल नागरिकको दायित्व पूरा गर्न प्रेरित गर्दै कर प्रणालीलाई प्रभावकारी रूपमा पालना गर्न प्रोत्साहन मिलोस भन्ने शुभेच्छा समेत प्रकट गरेका छन् ।
प्रधानमन्त्रीले राज्यले उपलब्ध गराउने सेवामार्फत संकलन गरिने कर नै राज्यकोषको प्रमुख आधार पनि भएकाले हरेक असल र कर्तव्यनिष्ठ नागरिकको सेवा लिएवापत कर तिर्नुपर्ने सोच हुनुपर्नेमा जोड दिए ।
‘प्रगतिशील कर प्रणालीप्रति सकारात्मक धारणाको विकास हुन नसकेसम्म राष्ट्र निर्माणको अभियानलाई गति प्रदान गर्न नसकिने समेत बताए ।
प्रधानमन्त्रीले आफ्नो शुभकामना सन्देशमा हामीले तिर्ने कर हाम्रै सेवा र सुविधाका लागि हो भन्ने कुरामा अब द्विविधा मान्नै नपर्ने उल्लेख गरेका छन् ।
प्रकाशित मिति: शुक्रबार, कात्तिक ३०, २०७५ १९:१६