नवलपरासी । पूर्व–पश्चिम राजमार्ग अन्र्तगत नवलपरासीको कावासोतीमा बिहीबार बिहान दाङबाट काठमाडौंका लागि छुटेको यात्रुवाहक बस दुर्घटना हुँदा १६ जना घाइते भएका छन् ।
दाङबाट काठमाडौंका लागि छुटेको ना ६ ख ६३०१ नम्बरको बस अनियन्त्रित भई सडक किनारमा पल्टिएको हो । दुर्घटनामा घाइते भएकामध्ये ४ को अवस्था गम्भीर छ । उनीहरुको नयाँ मेडिकल कलेज भरतपुरमा उपचार भइरहेको छ भने अन्य १२ जनाको कालीगण्डकी अस्पताल कावासोतीमा उपचार भइरहेको छ ।
गम्भीर घाइते हुनेमा दाङ सतवरीया–८ बस्ने २६ वर्षीया पूजा तामाङ, दाङ लमही–९ बस्ने ३० वर्षीया कल्पना बुढामगर, दाङ देउखुरी बस्ने ४७ वर्षीया रामदुल्ली चौधरी र दाङ देउखुरी–६ बस्ने ५० वर्षीय प्रदेसु चौधरी रहेको प्रहरीले जनाएको छ ।
चालक निदाएका कारण दुर्घटना भएको आशंका गरिएको र चालकलाई नियन्त्रणमा लिएर थप अनुसन्धान भइरहेको प्रहरीको भनाइ छ ।
प्रकाशित मिति: बुधबार, कात्तिक २८, २०७५ १९:१६