काठमाडौं । काठमाडौंको सानोभर्याङ नजिक मंगलबार राति कार र ट्याक्सी आपसमा ठोक्किँदा एक वृद्धाको मृत्यु भएको छ । दुर्घटनामा परी गोरखा सिरनचोक गाउँपालिका–७ की ७० वर्षीया मोतीसरा भुजेलको मृत्यु भएको छ ।
बा १० प ५१९१ नं को कार र बा २ ज ३१५ नंको ट्याक्सी एकापसमा ठोक्किँदा ट्याक्सीमा सवार भुजेल गम्भीर घाइते भएकी थिइन् । उनको स्वयम्भूस्थित मनमोहन मेमोरियल अस्पतालमा उपचारको क्रममा बुधबार बिहान मृत्यु भएको हो । ट्याक्सीमा सवार अन्य चार जनाको सोही अस्पतालमा उपचार भइरहेको जनाइएको छ ।
यस्तै, मोरङको बेलवारी नगरपालिका– ४ पूर्वपश्चिम राजमार्गमा गए राति भारतीय लहरीको ठक्करबाट मोटरसाइकल चालकको मृत्यु भएको छ ।
पूर्वबाट पश्चिमतर्फ जाँदै गरेको एचआर ४६ सी ७८७६ नं को भारतीय लहरीले विपरीत दिशाबाट आउँदै गरेको को २० प ६७०२ नं को मोटरसाइकललाई ठक्कर दिँदा सुनसरी, बराहक्षेत्र नगरपालिका–४ का १९ वर्षीय आर्यन चौधरीको घटनास्थलमै मृत्यु भएको प्रहरीले जनाएको छ । चालकलाई इलाका प्रहरी कार्यालय बेलवारीले नियन्त्रणमा लिएको छ ।
प्रकाशित मिति: मंगलबार, कात्तिक २७, २०७५ १९:१६
