काठमाडौँ । गएराती दोलखाको झ्याँकुमा पार्किङ गरेर राखेको रोलवालिङ यातायातको बा३ख ५९७० नम्बरको बसमा आगजनी भएको छ । मंगलबार दोलखाको सिंगटीबाट यात्रु बोकेर झ्याँकु पुगेको बस साउनेमा पार्किङ गरि राखेको अबस्थामा आगजनी भएको हो ।
गाडी धनी नबराज खड्काका अनुसार मंगलबार राती अन्दाजी १०/३० बजे गाडीमा अज्ञात समुहले आगो लगाएको देखेर नजिकैको होटल सञ्चालकले खबर गरेका थिए ।
ईलाका प्रहरी कार्यालय सिंगटीका अनुसार राति गाडी जलेको खबर आउनासाथ घटनास्थलमा प्रहरी पठाईएको थियो । प्रहरी पुग्दा गाडी जलेर पुरै नष्ट भएको प्रहरी निरिक्षक सानू तामाङले जानकारी दिए ।
घटनाबारे थप अनुसन्धान गर्न प्रहरी निरिक्षक तामाङ आफैं घटनास्थल खटिएका छन् । उक्त बसमा कसरी आगलागी भयो भन्नेबारे अनुमान लगाउन नसकिएको प्रहरीले जनाएको छ ।
उक्त बसमा ३ दिन अघि सत्तारुढ गठबन्धनका कार्यकर्ताले निर्वाचनको ब्यानर टास्न प्रयोग गरेको तस्बिर सार्वजनिक भएको छ । त्यसैले आगजनीको कारण राजनीतिक भएको हुनसक्ने कतिपयको बुझाई छ । घटनाबारे थप अध्ययन गर्न प्रहरी परिचालन गरिएको जिल्ला प्रशासन कार्यालय दोलखाले जनाएको छ ।
प्रकाशित मिति: बुधबार, कात्तिक २३, २०७९ ११:२८
