मध्यपहाडी लोकमार्गको रुकुमकोट पातीहाल्ना सडकखण्ड चार महिनापछि पुन सञ्चालन भएको छ । वर्षा शुरु भएसँगै गत असार महिनाबाट अवरुद्ध भएको उक्त सडकखण्डको धौलापहिरास्थित लुकुमगाड खोलामा कज्वये निर्माण भएपछि बाटो खुलेको हो । वर्षा सकिएसँगै पानीको बहाव बढ्न छोडेपछि खोलामा हिमपाइप हालेर कज्वये निर्माण गरिएको छ ।
लगातार चार दिनको प्रयासले खोलामा कज्वये निर्माण गरी बाटो खुलाइएको प्रमुख जिल्ला अधिकारी मोहनप्रसाद अर्यालले बताए । कज्वये निर्माणको लागि जिल्लामा ठेक्काको काम गरिरहेका सिद्धीसाही कन्स्ट्रक्सन, चन्द्र एण्ड वसन्त कन्स्ट्रक्सन, कालीका कन्स्ट्रक्सन तथा राप्ती हाइड्रोपावरको सहयोगमा बाटो खुलाउन सम्भव भएको उहाँले बताए । प्रजिअ अर्यालका अनुसार तीनवटा कन्स्ट्रक्सनले चारचार वटा हिमपाइप उपलब्ध गराएका थिए । १२ वटा हिमपाइप राखेर लुकुमगाड खोलामा अस्थायीरुपमा कज्वये निर्माण गरेपछि यातायातका साधन खोला पारपार भएका छन् । चार महिनादेखि अवरुद्ध भएको सडकखण्डमा कज्वये निर्माण गरी बाटो खुलाएपछि स्थानीय नागरिक खुशी भएका छन् ।
रुकुमकोटबाट घरसम्म पुग्दा दुई तीन ठाउँमा गाडी परिवर्तन गर्नुपर्ने र कतै हिँड्नुपर्ने बाध्यता अब टरेको भन्दै पुथा उत्तरगङ्गा गाउँपालिका–१ हुकामकी अन्जना बुढामगरले खुशी व्यक्त गरे । उक्त सडकखण्डमा यातायातका साधन सुचारु भएसँगै भुमे र पुथा उत्तरगङ्गा गाउँपालिकाका नागरिक सजिलै सदरमुकाम रुकुमकोटसँग जोडिएका छन् । नागरिकको सहजताको लागि धौलापहिरामा अस्थायीरुपमा कज्वये निर्माण गरेको र अब सजिलै जिल्लाबाट बागलुङ पुग्न सक्ने भुमे गाउँपालिका अध्यक्ष रामसुर बुढामगरले बताए । उनले भने, योभन्दा पहिले पनि गाउँपालिकाले यस खोलामा कज्वये निर्माण गरेको थियो, तर यस वर्षको असारमा खोलाले कज्वये नै बगाएर लगेको थियो । वर्षात्को भेलले कज्वये बगाएर लगेसँगै सावरीसाधन खोलापारीका पारी र खोलाबारीका बारीनै रहेका थिए ।
जिल्ला सममन्वय समिति, सिस्ने र भुमे गाउँपालिका, जिल्ला प्रशासन तथा जिल्ला प्रहरी कार्यालय रुकुम (पूर्व) को सहकार्य तथा समन्वयमा बिहीबार साँझबाट बाटो खुलाइएको प्रजिअ अर्यालले बताए । सिस्ने र भुमे गाउँपालिकाको सिमानामा रहेको लुकुमगाड खोलामा पुन नबन्दा हरेक वर्षको वर्षासँगै बढेको पानीको बहावले यातायातका साधन खोला वारपार गर्न सक्दैनन् । वर्षेनी पुल नबन्दाको पीडा नागरिकले भोगिरहेका छन् । उक्त खोलामा पुल निर्माणको कार्य शुरु गरेको सात वर्ष भइसक्दा पनि पुल निर्माणको काम भने अझै सम्पन्न हुन सकेको छैन । –रासस
प्रकाशित मिति: शुक्रबार, कात्तिक १, २०७६ ०८:१४
