नेपाल प्रहरीमा ३ हजार ५ सय ९६ दरबन्दी थप भएको छ । मन्त्रिपरिषद बैठकले गृह मन्त्रालयको प्रस्ताव स्वीकृत गरेसँगै प्रहरीमा दरबन्दी थपिएको हो । मन्त्रिपरिषद्बाट पारित दरबन्दी थपको प्रस्ताव कार्यान्वयनका लागि गृह मन्त्रालयले प्रहरी प्रधान कार्यालयमा पठाएको छ । यसको जानकारी गृहमन्त्री रामबहादुर थापा ‘बादल’को सचिवालयले दिएको छ ।
प्रहरी उपरीक्षक (एसपी) मा दुई , प्रहरी नायव उपरीक्षक (डिएसपी) मा ९, प्रहरी निरीक्षक (इन्स्पेक्टर) मा २७, प्रहरी नायव निरीक्षक (सई) मा ४९, प्रहरी सहायक निरीक्षक (असई) मा २ सय ३७, हवल्दारमा ६ सय ७१, जवानमा २ हजार १ सय ९५ र प्रहरी कार्यालय सहयोगीमा २ सय ३९ जनाको नयाँ दरबन्दी थप भएको गृह मन्त्रालयले जनाएको छ ।
त्यस्तैगरी प्रहरीको प्राविधिक सेवातर्फ पनि दबरन्दी थप भएको छ । प्राविधिकतर्फ एक एसएसपी, दुई एसपी, १२ डीएसपी, २० इन्सपेक्टर र ३७ प्राविधिक प्रहरी नायव निरीक्षक (सई) पदमा दरबन्दी थप भएको छ ।
प्रकाशित मिति: मंगलबार, असोज २८, २०७६ ११:२६
