अमेरिकाले सन् २०२१ को डाइभर्सिटी भिसा (डिभी) कार्यक्रमको लागि आवेदन खोलेको छ। काठमाडौंस्थित अमेरिकी दूतावासका अनुसार बुधबार राती ९:४५ बाट यो कार्यक्रमको लागि अनलाइन आवेदन दिन सकिनेछ।
‘हामी डिभी आवेदकहरूलाई चाँडै नै आवेदन भर्न प्रोत्साहित गर्दछौं,’ अमेरिकी दूतावासद्वारा बुधबार जारी विज्ञप्तिमा जनाइएको छ, ‘डिभी कार्यक्रममा सहभागी हुनका लागि कुनै शुल्क लाग्दैन।’
एक व्यक्तिले एकपटक मात्र आवेदन दिन सक्नेछन् । एकभन्दा बढी पटक आवेदन फारम भर्ने व्यक्ति डीभीका लागि अयोग्य ठहरिने छन् । डीभीको अनलाइन फारम आफैंले भर्न र फारम भरिसकेपछि प्राप्त हुने कनफर्मेसन नम्बर सुरक्षित राख्नु पर्ने छ । नतिजा सार्वजनिक भएपछि त्यही कन्फर्मेसन नम्बरको आधारमा आफूलाई डीभी परे/नपरेको थाहा हुन्छ ।
यसपटक आवेदन दिँदा बहालवाला, म्याद समाप्त नभएको राहदानीको विवरणसमेत राख्नुपर्नेछ । राहदानी नम्बर, जारी भएको देश र राहदानीको म्याद समाप्त हुने मिति उल्लेख गर्नुपर्नेछ । आवेदन दर्ता गर्दा आवेदकले आफ्नो इमेल ठेगाना प्रदान गर्नुपर्नेछ।
यस वर्ष ५५ हजारले डीभी चिठ्ठामार्फत् अमेरिकाको भिसा पाउने अमेरिकी अधिकारीहरु बताउँछन् । व्यक्तिगत विवरणको आधारमा कम्प्युटर सिस्टमले डीभीको लागि योग्य व्यक्तिहरुको छनोट गर्ने छ । तर डीभी पर्दैमा अमेरिकाको भिसा पाउने निश्चित हुँदैन । त्यसपछि पनि बिभिन्न सर्त र प्रक्रियाहरु पूरा गर्नु पर्ने अधिकारीहरु बताउँछन् ।
प्रकाशित मिति: बुधबार, असोज १५, २०७६ ०९:२१