कैलालीको हरैया शिविरका घर–टहरा भत्काएको विरोधमा बिहीबार पूर्व–पश्चिम राजमार्ग अवरुद्ध पारिएको छ । घर–टहरा हटाउन तत्कालीन माओवादी केन्द्रनिकट ‘वाइसीयल’का युवाहरु परिचालन गरिएपछि विरोधमा स्थानीयले पूर्व–पश्चिम राजमार्ग अवरुद्ध पारेका हुन् ।
गोदावरी नगरपालिका वडा नम्बर–६ मा रहेको हरैया खन्डमा राजमार्ग अवरुद्ध पारिएको हो । बुधबार रातिदेखिको वर्षाका कारण जनजीवन प्रभावित भएका बेला हरैया शिविरमा युवाहरु परिचालन गरेर संरचना भत्काउन लागिएपछि स्थानीयले राजमार्ग अवरुद्ध पारेका हुन् ।
हरैयाका सुकुम्वासीलाई उठाएर धनगढी उपमहानगरपालिका–१७ स्थित धुरझन्नामा राखिएको थियो । तर, त्यहाँ व्यवस्थापन राम्ररी नगरिएको भन्दै केही फेरि हरैया फर्किएका थिए । कतिपय हरैयामै बसिरहेका छन् । ९१ परिवारको बसोबास धुरझन्नामा रहेको छ । ४८ परिवार हरैयामै बस्दै आएका छन् ।
हरैयामा सुकुम्वासी बसेको जग्गा खरिद गर्ने सौभाग्य रियल स्टेट एन्ड हाउजिङ प्रालि पोखराले धुरझन्नामा ५९ कट्ठा जग्गा किनेर उनीहरुलाई व्यवस्थापन गरेको दाबी गर्दै आएको छ । सौभाग्य रियल स्टेटले गएको माघ २५ गते सुकुम्वासी बसेको हरैयास्थित २१ विगाहा जग्गा खरिद गरेको थियो । जग्गा बिक्रीमा तत्कालीन माओवादीका केही नेताको संलग्नता रहेको आरोप लाग्दै आएको छ ।
जग्गा बिक्रीपछि हरैयाबाट हटाउन खोज्दा सुकुम्वासीहरु प्रतिकारमा उत्रेका थिए । २०६१ सालमा तत्कालीन विद्रोही माओवादीले नै उक्त जग्गामा सुकुम्वासीलाई बसाएको थियो ।
प्रकाशित मिति: बिहीबार, असार २६, २०७६ २०:५९