रौतहट - रौतहटमा प्रहरीको भ्यान मंगलबार दिउसो दुर्घटना हुँदा दुई जना थुनुवाको मृत्यु भएको छ भने प्रहरी सहित ८ जना घाइते भएका छन् । थुनुवा लिएर चन्द्रपुरबाट गौरतर्फ म्याद थप गराउन हिँडेकाे प्रहरी भ्यान गौर-चन्द्रपुर सडकखण्डको बालचनपुर नजिक दुर्घटना हुँदा दुई जना थुनुवाको मृत्यु भएकाे प्रहरीले जनाएकाे छ ।
दुर्घटनामा चन्द्रपुर नगरपालिका-४ का २० वर्षीय मुकेश भन्ने निर्मल साह तथा सुनसरी इनरुवा-१ बस्ने ४० वर्षीय रमेशकुमार चौधरीकाे गम्भीर घाइते भएर उपचारको लागि विरगञ्ज लैजाँदै गर्दा बाटोमै ज्यान गएकाे भएको प्रहरी कार्यालय रौतहटले जनाएको छ ।
दुर्घटनामा परेर गम्भीर घाइते भएका प्रहरी जवानद्वय हरिकिशोर चौधरी र अजय यादवलाई उपचारको लागि विरगञ्ज पठाइएको छ भने अन्य सामान्य घाइतेहरूकाे चन्द्रपुर अस्पतालमा उपचार भइरहेको रौतहट प्रहरी कार्यलयले जनाए ।
प्रकाशित मिति: बुधबार, असार ११, २०७६ ००:००