काठमाडौं : संखुवासभाको मकालु गाउँपालिका–५ का पहिरोले विस्थापित ३७ परिवारलाई सोमबार हेलिकप्टरबाट राहत सामग्री लगिएको छ । असार २ गते बर्षा सँगै आएको पहिरोले मकालु–५ र ३ नम्बर वडाका ३७ परिवार विस्थापित भएका छन् । विस्थापितहरुलाई गाउँपालिकाले सोमबार हेलिकप्टरबाट राहत सामग्री पु-याएको हो ।
पहिरोले पेपुवाका २९ परिवार विस्थापित भएका थिए भने २२ परिवार भन्दा बढी पहिरोको उच्च जोखिममा परेका छन् । विस्थापितहरुलाई गाउँपालिकाले १ सय १७ बोरा चामल, १२ बोरा दाल, सय किलो नुन, ७२ थान पाल लगायतका राहत सामग्री वितरण गरेको छ । आइतबार लग्ने भनिएको राहत सामग्री मौसममा खराबी आएको भन्दै नेपाली सेनाको हेलिकप्टर नआउदाँ राहत सामग्री सदरमुकाम मै थन्किएको थियो ।
राहत सामग्री लिएर प्रतिनिधिसभाका सांसद राजेन्द्र गौतम, जिल्ला समन्वय समितीका प्रमुख सुमन शाक्य, मकालु गाउँपालिकाकी कार्यवाहक अध्यक्ष चमेली राईसहितको टोली पेपुवा पुगेको थियो । उनीहरुले पहिरोको स्थलगत निरिक्षण गरेका थियो ।
५३ जनाको हेलिकप्टरबाट उद्दार
पहिरोबाट विस्थापित पेपुवाका ५३ जनालाई हेलिकप्टरबाट उद्दार गरेर गाउँपालिका कार्यालय नुम लगिएको छ । पहिरोबाट उच्च जोखिममा परेका मकालु–५का चार वटा गाउँका ५३ जनालाई गाउँपालिकाले उद्दार गरेर नुम लगेको हो । गाउँलाई चारै तिरबाट पहिरोले घेरेका कारण कुनै पनि बेला पहिरो जान सक्ने खतरा भएका कारण उनीहरुको उद्दार गरेर नुम लग्नु परेको मकालु गाउँपालिकाकी कार्यवाहक अध्यक्ष चमेली राईले जानकारी दिइन् । उनीहरु हिजो सम्म छिमेकी सडेक्मा भन्ने गाउँमा शरण लिएका बसेका थिए ।
पहिराले मकालुको सडेक्मा, छिरिन्ते, हेदाङ्नागढी, खोकताक, नुम, आम्राङ, सोलाखानीका कतिपय घरपरिवार समेत जोखिममा परेका छन् । त्यस क्षेत्रमा दिउँसो घाम लागे पनि रातको समयमा ठूलो पानी पर्न गरेको स्थानियको भनाइ छ । पहिरोले मकालु गाउँपालिका सबै वडाका गाउँ बस्तीमा चिरा चिरा पारेको छ । पहिरोले ९० स्थान भन्दा बढी क्षेत्रमा पहिरो गएकाले बाटो घाटो समेत बन्द भएका कारण दैनिक उपभोग्य बस्तु किनमेल गर्न जान आउन समेत समस्या भएको गाउँपालिकाकी कार्यवाहक अध्यक्ष चमेली राईको भनाइ छ ।
प्रकाशित मिति: सोमबार, असार ९, २०७६ २१:०२
