काठमाडाैं : सत्तारुढ दल नेपाल कम्युनिष्ट पार्टी (नेकपा)की सांसद जुली कुमारी महतोले उद्योग, व्यापार र कल काराखानाको विकास नभएसम्म मुलुकको विकास सम्भव नहुने बताएकी छन् । उनले संसद बैठकमा बोल्दै मुलककाे विकासका लागि उद्याेगकाे विकास गर्नुपर्ने बताएकी हुन् ।
उनले निजामती, सेना र प्रहरीमा भर्ति खुलाएर मुलुकको बेरोजगारी समस्या समाधान गर्न नसकिने बताइन् । उनले कम्तीमा तत्काल सञ्चालन हुनेगरि सात वटै प्रदेशमा त्यहाको आवश्यक्ता र संम्भावनाका आधारमा एउटा एउटा उद्योग सञ्चालन गर्न माग गरिन् । उनले भनिन्, विगतमा सरकार आफैँले सञ्चालन गरेका उद्योगहरु जुन एकपछि अर्को गर्दै बन्दको अवस्थामा पुगे यदि सञ्चालन गर्न सकिने अवस्थाका हुन भने तत्काल ति बन्द उद्योग सञ्चालन गर्न उद्योग मन्त्रालयसंग जोडदार माग गर्दछु ।
उनले सरकारले अघि सारेको सात वटै प्रदेशमा १० वटाका दरले औधोगिक ग्रामको विकास तथा निर्माण अध्ययनको कार्यक्रमले मुलुकमा उद्याेग विकासका लागि महत्वपूर्ण भूमिका खेल्ने बताइन । यो कार्यक्रम अध्ययन अनुसन्धानमा मात्रै सिमित नरही अध्ययन सम्पन्न भएलगत्तै युद्धस्तरमा उद्याेग ग्रामहरुको विकास हुने विश्वास व्यत्त गरिन् ।
उनले मुलुकका जनतालाई पूर्ण शान्ति सुरक्षाको प्रत्याभूति गराउनका साथै संसारका मानिसहरुलाई हामी सुरक्षित छौ भन्ने ग्यारण्टी नगरेसम्म आन्तरिक लगानीको वातावरण निर्माण नहुने बताइन ।
साथै उनले सुखी नेपाली र सम्बृद्ध नेपालको अभियानतर्फ जानका लागि पनि हाम्रो पहिलो सर्त सुरक्षा हुने र सुरक्षामा तेरो मेरो नभनी कहिँ कतै सम्झौता गर्न नहुने बताइन । उनले भनिन्, प्रहरी मेरो साथी भने पनि व्यवहारमा प्रहरी आजपनि सर्वसाधारणको अघि शासकको रुपमा प्रस्तुत भईरहेको छ । जसले गर्दा गरिव नेपाली प्रहरीकहाँ आफ्नो गुनासो लिएर जानै सकिरहेको छैन । यदि गइहाले आफ्नो कुरा प्रष्ट संग राख्न सकिरहेको छैन ।
प्रकाशित मिति: सोमबार, असार २, २०७६ १८:५३
