काठमाडौं : न्यूरोडमा आज (आइतबार) देखि स्मार्ट पार्किङ शुरु हुने भएको छ ।
केही समय परीक्षण गरिँदै आएको स्मार्ट पार्किङको आज विहान काठमाडौं महानगरका प्रमुख विद्यासुन्दर शाक्यले उद्घाट गरेका छन् । स्मार्ट पाकिङका लागि ५ स्थानको व्यवस्था गरिएको जनाइएको छ ।
कम्पनीका आईटी कोअर्डिनेटर हरिश अग्रवालका अनुसार रामेश्वरम, विशालबजार, खिचापोखरी, धर्मपथ र पाकोमा स्मार्ट प्रणाली उपलब्ध हुने जनाइएको छ । यी स्थानमा ८ सय बाइक र ६० वटा गाडी पार्किङ गर्न सक्ने क्षमता छ । यी क्षेत्रमा पार्किङ गर्दा दुइ पाङग्रे सवारीका लागि प्रति घण्टा करबाहेक २० रुपैयाँ लाग्नेछ । त्यस्तै चार पाङग्रे सवारीका लागि प्रति घण्टा ६० रुपैयाँ लाग्नेछ ।
कसरी गर्ने स्मार्ट पार्किङ ?
प्रयोगकर्ताले केटिएम एप्लिकेशन मार्फत पार्किङ बुकिङ गर्न सक्ने जनाइएको छ । पार्किङ गर्न चाहने व्यक्तिले एप्लिकेशन मार्फत घरमै बसेर पार्किङका बारेमा सुचना लिन सक्ने र १५ मिनेट अगाडी नै पार्किङ बुकिङ गर्न पाउने जनाइएको छ ।
रिजर्भ गरेको समय, पार्किङ गरिएको स्थान र समय, पार्किङ शुल्कजस्ता विवरण क्युआर कोर्डबाट पनि हेर्न सकिन्छ । त्यस ठाउँको व्यवस्थापनका लागि गोप्रो क्यामरा सहित ६० जना पार्किङ सहयोगी खटिएका छन् । यस प्रणालीमा सवारी प्रवेश गरेको र निस्किएको रेकर्ड हुन्छ ।
प्रकाशित मिति: आइतबार, असार १, २०७६ १६:४८
