काठमाडौं : सरकारले ल्याउन लागेको मिडिया काउन्सिल विधेयक फिर्ता लिन माग गर्दै नेपाल पत्रकार महासंघले तेस्रो चरणको आन्दोलनमा उत्रने घोषणा गरेको छ।
महासंघले मंगलबार एक विज्ञप्ति जारी गर्दै तेस्रो चरणको आन्दोलनका कार्यक्रमहरु घोषणा गरेको हो । सरकारले पत्रकारहरुको अधिकार कुण्ठित गर्दै आम नागरिकको सुचनाको हक माथि वन्देज लगाएकाे भन्दै महासंघले असार ३ गते प्रेस स्वतन्त्रताको पक्षमा देशब्यापी हस्ताक्षर संकलन अभियान, ६ गते संकलित हस्ताक्षर जिल्ला प्रशासन कार्यालयमार्फत प्रधानमन्त्रीलाई बुझाउने,असार १० गते मिडिया काउन्सिल विधयक विरुद्ध कार्टुन प्रर्दशनी गर्ने कार्यक्रम सार्वजनिक गरेको हो ।
यस्तै महासंघले असार १५ गते सबै जिल्ला शाखाहरुले आफ्नो क्षेत्रबाट निर्वाचित संघीय र प्रदेश सांसदहरुलाई एसएमएस मार्फत् सन्देश पठाएर ध्यानाकर्षण गर्ने,असार २० गते बृहत् ‘प्रेस स्वतन्त्रतासभा’को आयोजना गर्ने, असार २५ गते मध्यान्ह १२ः०० बजे लालटिन जुलुस निकाल्ने, ३० गते देशव्यापी सिटी जुलुस र सभा गर्ने जनाइएको छ ।
महासंघका महासचिव रमेश विष्टले विज्ञप्ति मार्फत मिडिया काउन्सिल विधेयक संसद्मा पेश हुने दिन देशव्यापी रुपमा आकस्मिक विरोध प्रदर्शन गर्ने र आवश्यकताअनुसार कार्यक्रमलाई थपघट र परिमार्जित गरिने बताएका छन् ।
प्रेस काउन्सिल रहँदा पनि मिाडया काउन्सिलको नाममा सरकारले स्वतन्त्र पत्रकारीता माथि हस्तक्षेप गरेको आरोप महासंघको छ । महासंघले आन्दोलनमा सक्रिय सहभागिता जनाउन सम्पुर्ण आमसञ्चारकर्मी, सञ्चार सम्बद्ध संघ–संगठन, पेशाकर्मी, तथा अभिव्यक्ति स्वतन्त्रताका पक्षधरहरुलाई विज्ञप्ति मार्फत आहृवान गरेको छ ।
प्रकाशित मिति: मंगलबार, जेठ २८, २०७६ २१:२३
