कास्की : विश्वको सर्वोच्च शिखर सगरमाथाको सफल आरोहण गरेर कीर्तिमानी कायम गरेका एचआईभी सङ्क्रमित गोपाल श्रेष्ठलाई सम्मान गरिएको छ ।
पोखरा महानगरपालिका- ७ निबासी श्रेष्ठलाई पोखरा महानगरपालिकाले आज सम्मान गरेको हो । विगत २५ वर्षदेखि एचआईभीबाट पीडित पूर्व ए डिभिजन फुटबल खेलाडी ५६ वर्षीय श्रेष्ठले यही जेठ ८ गते सर्वोच्च शिखर सगरमाथाको सफल आरोहण गरेका थिए ।
महानगर प्रमुख मानबहादुर जीसीले श्रेष्ठलाई दोसल्ला तथा मायाको चिनोसहित सम्मान गर्दै श्रेष्ठ पोखराको शान र गौरव रहेको तथा महानगरको झण्डा सगरमाथाको चुचुरोमा फर्फराएकामा आभार व्यक्त गरे । महानगर प्रमुख जीसीले भने, श्रेष्ठजी प्रेरणाको स्रोत हुनुभएको छ, कुनै रोग लाग्यो भन्दैमा हीनताबोध गर्नुहुन्न भन्ने सन्देश उहाँले गरेको सगरमाथा आरोहणले दिएको छ । श्रेष्ठको सगरमाथा आरोहणबाट एचआईभी सङ्क्रमितले पनि समाजमा केही सकारात्मक सन्देश दिन सक्दछन् भन्ने पुष्टि भएको प्रमुख जीसीले उल्लेख गरे ।
सम्मानित व्यक्तित्व श्रेष्ठले एचआईभी भएको भनेर सार्वजनिक नगर्न दबाब आए पनि आफूले सङ्क्रमित व्यक्ति समाजमा लुकेर बस्नुहुँदैन, केही न केही गर्नुपर्छ भनेर खुलेर प्रस्तुत भएको बताए । सगरमाथा आरोहण गर्छु भन्दा कतिपयले हाँसोका रूपमा लिएको र कतिले सोच राम्रो हो तर खै भन्ने गरेको स्मरण गर्दै श्रेष्ठले पहिलो पटक वि.सं. २०७२ मा आरोहणको तयारी गरे पनि भूकम्पका कारणले आधार शिविरबाटै फिर्ता हुनुपरेको सुनाए । अनेक चुनौतीको सामना गर्दै सगरमाथाको चुचुरोमा पुगेको बताउँदै उनले एचआईभी सङ्क्रमितलाई समाजले हेर्ने दृष्टिकोणमा परिर्वतन जरुरी रहेको उल्लेख गरे ।
महानगरपालिकाका प्रवक्ता एवम् वडा नं.- ५ का अध्यक्ष धनबहादुर नेपालीले श्रेष्ठ पोखराको शान र गौरव भएको बताउँदै उनको नाम विश्व रेकर्डमा दर्ज हुने बताए । कार्यक्रममा श्रेष्ठको आरोहणमा सहयोग पुर्याउने व्यक्तिहरूलाई पनि सम्मान गरिएको थियो ।