काठमाडौं : सत्तारुढ नेपाल कम्युनिष्ट पार्टीका वरिष्ठ नेता एवम् पूर्वप्रधानमन्त्री माधवकुमार नेपालले अमेरिकी राजदूत र्याण्डी बेरीले ‘जनतासँग गफगाफ’ संवाद कार्यक्रम सञ्चालन गर्न लागेकोमा असन्तुष्टि व्यक्त गरेका छन् ।
वरिष्ठ नेता नेपालले अन्तर्राष्ट्रिय अभ्यासमै नभएका त्यस्ता संवाद कार्यक्रम कूटनीतिक मर्यादाविपरीत हुने भएकाले सञ्चालन नगर्न पनि राजदूत बेरीको ध्यानाकर्षण गराए । बुधबार सङ्घीय संसद् परिसरमा सञ्चारकर्मीले राखेका जिज्ञासाको जवाफ दिने क्रममा उनले कूटनीतिक मर्यादाको पालना ठूला देशले पनि गर्नुपर्नेमा जोड दिए । वरिष्ठ नेता नेपालले कूटनीतिक मर्यादाको पाठ सिकाउने देशहरूले त झन् त्यसको पालना गर्नुपर्ने उल्लेख गरे ।
नेकपाकै अर्का नेता भीम रावलले कूटनीतिक मर्यादाविपरीत गएर अमेरिकी राजदूत बेरीले नेपाली जनतासँग प्रत्यक्ष रूपमा संवाद गर्ने खालका कुनै पनि गतिविधि गर्न नमिल्ने प्रतिक्रिया दिए । उनले कूटनीतिक क्षेत्रको कानुन, मर्यादा कुनै पनि दृष्टिले राजदूत बेरीलाई उक्त संवाद कार्यक्रम सञ्चालन गर्ने अनुमति नरहेको दाबी पनि गरे ।
यसरी नै प्रमुख प्रतिपक्ष नेपाली कांग्रेसका सांसद राजेन्द्रकुमार केसीले सरकारको अनुमतिबिना अमेरिकी राजदूत बेरीले जनतासँग प्रत्यक्ष रूपमा गएर कुनै पनि कार्यक्रम गर्न नमिल्ने बताए । उनले कूटनीतिक मर्यादा प्रतिकूल हुने खालका त्यस्ता गतिविधिमा संलग्न नहुन पनि नेपालस्थित कूटनीतिक नियोगका प्रतिनिधिहरूलाई सचेत गराए ।
राष्ट्रिय जनता पार्टी, नेपालका सांसद लक्ष्मणलाल कर्णले सरकारसँग अनुमति नलिई राजदूत बेरीलाई उक्त संवाद कार्यक्रम सञ्चालन गर्ने अधिकार नभएको दाबी गरे । उनले कूटनीतिक मर्यादाको सीमामा रहेर आफ्ना गतिविधि सञ्चालन गर्न पनि नेपालस्थित कूटनीतिक नियोगका प्रमुखहरूको ध्यानाकर्षण गराए ।
अमेरिकी राजदूत बेरीले आगामी सोमबारदेखि सुरु गर्न लागेको ‘राजदूतसँग गफगाफ’ संवाद कार्यक्रमको सन्देश उनकै फेसबुक पेजमार्फत् सार्वजनिक भएपछि त्यसको विरोध हुन थालेको हो ।
प्रकाशित मिति: बुधबार, जेठ ८, २०७६ २१:२५
