काठमाडौं : नेपाल कम्युनिष्ट पार्टीका अध्यक्ष पुष्पकमल दाहाल प्रचण्ड र बेलायतको अन्तर्राष्ट्रिय विकास विभागकी मन्त्री बरोनस सगबीच आज भेटवार्ता भएको छ ।
प्रचण्ड निवास खुमलटारमा भएको भेटमा नेपालको वर्तमान राजनीति र आर्थिक समृद्धिका विषयमा छलफल भएको बताइएको छ । भेटमा प्रचण्डले नेपालमा राजनीतिक स्थिरता कायम भएको र आफूहरू आर्थिक समृद्धिका लागि अगाडि बढेको बताए ।
उनले नेपालको शान्ति प्रक्रिया, नयाँ संविधान र तीन तहको निर्वाचनपश्चात अब देशको आर्थिक समृद्धि एक मात्र लक्ष्य रहेको प्रष्ट पारे । देशमा लगानीमैत्री वातावरणका लागि वर्तमान समय उचित रहेको बताउँदै प्रचण्डले कृषिमा आधारित उद्योग, पर्यटन, जलविद्युत र भौतिक पूर्वाधारका क्षेत्रमा लगानी आवश्यक रहेको बताए ।
बेलायतकी मन्त्री सगले नेपालमा महिलाको राजनीति र सामाजिक क्षेत्रमा भएको सहभागिताले आफू अत्यन्त प्रभावित बनेको बताइन् । उनले स्थानीय, प्रदेश र केन्द्रका निर्वाचनमा महिलाको सहभागिता दुनियाँका लागि उदाहरणीय कार्य भएको उल्लेख गरिन् ।
प्रकाशित मिति: बुधबार, जेठ ८, २०७६ २०:३१