कठमाडौं : प्रमुख प्रतिपक्षी दल नेपाली कांग्रेसले संसदमा पेस गरिएको मिडिया काउन्सिलसम्बन्धी विधेयक संविधानको मूल्य र मान्यताविपरीत आएको दाबी गर्दै तत्काल फिर्ता लिन सरकारसँग माग गरेको छ ।
कांग्रेस संसदीय दलकी सचेतक पुष्पा भुसालले संविधानको मूल्य र मान्यताविपरीत प्रेस स्वतन्त्रतालाई संकुचन बनाउने गरी ल्याइएकाले विधेयक तत्काल फिर्ता लिन सरकारसँग माग गरिन् ।
बुधबार उनले सो विधेयक सरकारले तत्काल फिर्ता नलिए आफ्नो पार्टीले अघि बढाउन नदिने चेतावनी दिइन् । भुसालले सरकारले संसदमा पेस गरेको सो विधेयक मुलुकको लोकतन्त्रले नचिन्ने र आफूहरूले नबुझ्ने भएकाले त्यसलाई सरकारले संसदबाट फिर्ता गराउनुको विकल्प नरहेको बताइन् ।
सरकारले राज्य नियन्त्रित कानुन बनाएर मुलुकलाई अधिनायकवादतर्फ उन्मुख गराउने खोजेको सचेतक भुसालले आरोप पनि लगाइन् ।
