काठमाडौं : विद्यालय, अदालत र मिडिया तीनै क्षेत्रमा नेपाली भाषामा एकरूपता ल्याइने भएको छ । नेपाली भाषाको प्रयोगमा विविधता आएको भन्दै नेपाल प्रज्ञाप्रतिष्ठानबाट प्रकाशित दशौंँ संस्करण ‘बृहत् नेपाली शब्दकोश’अनुसार सबै क्षेत्रमा भाषामा एकरूपता ल्याउन लागिएको हो ।
भाषामा एकरूपता ल्याउने विषयमा प्रतिष्ठानले सबै क्षेत्रमा गोष्ठी तथा छलफल अघि बढाइरहेको प्रतिष्ठानका सदस्य सचिव जगतप्रसाद उपाध्यायले बताए । राष्ट्रिय परीक्षा बोर्डले पनि आफ्ना मातहतका सबै तहमा परिपत्र पठाइसकेको छ , उनले भने । नयाँ प्रकाशन हुने नेपाली पाठ्यपुस्तक शब्दकोशको वर्णविन्यासअनुसार तयार गरिने बताइएको छ ।
उपाध्याय भन्छन्, नेपाली विषय पढाइ हुने सबै निजी र सरकारी विद्यालयका पाठ्यपुस्तकमा नेपाली भाषामा एकरूपता ल्याइन्छ । शैक्षिक क्षेत्रमा एकरूपता ल्याउन शिक्षा मन्त्रालयले परिपत्र जारी गरिसकेको छ ।
प्रज्ञाप्रतिष्ठानबाट प्रकाशित बृहत् नेपाली शब्दकोशको नवौँ संस्करणमा मानक नेपाली भाषालाई विद्रुप बनाइएको र त्यसलाई सच्याइनुपर्ने, विद्यालय र विश्वविद्यालयका पाठ्यपुस्तकमा मानक भाषाको प्रयोग गरिनुपर्ने, सरकारी निकाय र कार्यालयमा मानक नेपाली भाषा मात्र प्रयोग गर्नुपर्नेलगायतका मागसहित मानक नेपाली भाषा अभियान अन्तर्राष्ट्रिय संजालले अभियान चलाएपछि केही समयअघि प्रज्ञाप्रतिष्ठानले शब्दकोशको नवौँ संस्करण सच्याएको र दशौँ संस्करण परिमार्जन गरेर प्रकाशन गरेको थियो ।
संजालका अध्यक्ष प्रा.डा. खगेन्द्रप्रसाद लुइँटेलले भाषामा एकरूपता ल्याउने प्रज्ञाप्रतिष्ठानलगायतका निकाय र सम्बद्ध पक्षको प्रयास एकदमै स्वागतयोग्य र मानक नेपाली भाषाको हितमा रहेको प्रतिक्रिया दिए ।