काठमाडौं : नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले आफ्ना नेताहरूले एकता प्रकृया, सरकारका कामकारवाही र कम्युनिष्ट नेताहरूको आचरणबारे उठाइएका प्रश्नहरूप्रति सहमत रहेको बताएका छन् ।
युवा संघ नेपालको स्थापना दिवसका अवसरमा आयोजित कार्यक्रमलाई सम्बोधन गर्दै उनले पार्टी एकता नेतृत्वको ठोस पहलकै कारण सम्भव भएको भन्दै नेतृत्वले हिम्मत नगरेको भए अहिले कम्युनिष्ट नेतृत्वको सरकार नबन्ने दाबी गरे ।
एकताका लागि कसै न कसैले पहल गर्नेपर्ने भन्दै उनले नेतृत्वको ठोस पहल कदमीबाटै ठूल्ठूला परिवर्तन भएका उल्लेख गरे । प्रचण्डले एकताप्रति असन्तुष्टि जनाएका नेताहरूप्रति लक्षित गर्दै पार्टी एकता निरन्तरताको क्रमभङ्ग भएको बताए ।
‘संसार हाम्रो हो, तपाईंहरूको पनि हो तर अन्तिममा तपाईंहरूकै हो’ भन्ने माओको भनाइ स्मरण गर्दै त्यही सोचअनुसार अघि बढ्नुपर्ने उनले बताए । उनले काम गर्दै जाँदा केही गल्ती भए त्यसलाई सच्चाउन सक्नुपर्ने धारणा राखे ।
सम्बोधनका क्रममा अध्यक्ष प्रचण्डले पटक–पटक माधव नेपालको नाम उच्चारण गर्दै नेपालको भनाइप्रति आफ्नो सहमति रहेको पनि बताए ।
‘म माधव नेपालाई विश्वास गर्छु । झलनाथ खनाल अर्को पार्टीको अध्यक्ष हुनुहुन्थ्यो तर खनाललाई प्रधानमन्त्री बनाउँदा राष्ट्रको हितमा हुन्छ भनेर मैले छापामार शैलीमा प्रधानमन्त्री बनाएको हुँ’ भन्दै प्रचण्डले सही र गलत छुट्याउन युवा नेताहरूलाई आग्रह गरे ।
प्रचण्डले सकभर जेठ ३ गते पार्टी एकता हुने नभए ३ वा ४ मा पनि हुने बताए ।
प्रकाशित मिति: बुधबार, जेठ १, २०७६ २०:४३