सुरेश बुढाथोकी, सिन्धुपाल्चोक : अक्सफामको सहयोगमा बन्न लागेको एकिकृत बस्ती शिलान्यासमा राजनीतिक हस्तक्षेप भएको भन्दै स्थानीयले विरोध गरेपछि शिलान्यास कार्यक्रमनै स्थगित भएको छ । इन्द्रावती गाउँपालिका ५ मा निर्माण हुन लागेको बस्ती कसले शिलान्यास गर्ने भन्नेमा विवाद भएपछि मंगलबार शिलान्यास कार्यक्रम स्थगन भएको हो ।
इन्द्रावती गाउँपालिकाले बस्तीका पाका उमेरका व्यक्तिबाट शिलान्यास गराउने निर्णय समितिसँग निर्णय गरेको थियो । तर, पछि अन्तिम समयमा आएर प्रदेश नं ३ का सामाजिक विकास मन्त्री युवराज दुलालले एकिकृत बस्तीको शिलान्यास राजनीतिक हस्तक्षेप गरि गराउन लागेपछि विवाद भएको स्थानीयको भनाई छ । विवाद उत्कर्षमा पुगेपछि शिलन्यासको विषयलाई लिएर समिति र स्थानीय नेकपा नेताबीच माइन्युट च्याताच्यातसमेत् भएको माझी भदौंरे एकिकृत बस्ती निर्माण समितिकी अध्यक्ष शर्मिला माझीले बताइन् ।
अक्सफामको आर्थिक सहयोगमा महिला आत्मनिर्भर केन्द्रले ३६ माझी परिवारको लागि बनाउन लागेको एकिकृत बस्तीको शिलन्यासमै राजनीतिक विवाद आएपछि रोकिएको हो । ‘शिलन्यास कस्ले गर्ने भन्ने विवादले एकिकृत बस्ती निर्माण नै अन्योलमा परेको छ,’ अध्यक्ष सर्मिला माझीले भनिन् । शिलान्यासमा राजनीतिक हस्तक्षेप हुँदा विवाद आएपछि एकिकृत बस्ती शिलन्यास कार्यक्रम बीचैमा रोकिएको इन्द्रावती गाउँपालिकाका प्रमुख वंशलाल तामाङले बताए ।
‘हस्तक्षेपले गर्दा एकिकृत बस्ती अन्योलमा परेको छ, यसको समाधान गर्न संस्था,स्थानीय र जनप्रतिनिधि बसेर छलफलमा लाग्दैछौ, ’उनले भने । भुकम्पको पराकम्पनले वरीपरीको भुभाग ध्वस्त भएपछि विस्थापीत भएका प्युघरमा ३६ माझी परिवार अन्योलमा परेका थिए । भुकम्पको चारवर्षपछि बल्ल थालिएको एकिकृत बस्ती विवादमा अल्झिएको उनले प्रष्ट्याए ।
भूकम्प र त्यसपछि माझी गाउँ हुँदै बन्दै गरेको मध्यपहाडी लोकमार्गले बस्ती कटान गरेपछि मन्त्री दुलालले उनीहरुलाई नयाँ स्थानमा सार्न पहल गरेका थिए । दुलालले स्थानीयसँग बसेर छलफलसमेत गरेका थिए ।
प्रकाशित मिति: मंगलबार, चैत ५, २०७५ २३:१९